Azərbaycan Bəstəkarlar İttifaqının Üzeyir Hacıbəyli konsert salonunda qurumun sədri Xalq artisti, UNESCO-nun “Sülh artisti”, AMEA-nın müxbir üzvü Firəngiz Əlizadə ilə elm və incəsənət xadimlərinin yaradıcılıq görüşü keçirilib.
Toplantı Firəngiz Əlizadənin “Zəfər marşı”nın səslənməsi ilə başlayıb. Firəngiz Əlizadə ABİ-nin 2023-cü ildə reallaşdırdığı layihələrdən, xüsusən də ulu öndər Heydər Əliyevin 100 illiyi ilə əlaqədar keçirilən silsilə tədbirlərdən danışıb. Sonra o özünün yaradıcılıq hesabatı olaraq bir sıra ölkələrdə məşhur musiqiçilər tərəfindən ifa edilən əsərlərindən söz açıb. Bəstəkarın konsertlərinin afişaları, fotoları nümayiş olunub. Sonra Rusiya Televiziyasının “Mədəniyyət” kanalında yayımlanan “Eniqma” verilişinin Firəngiz Əlizadəyə həsr olunan buraxılışının videoyazısı təqdim edilib. Tədbirin sonunda bəstəkar iştirakçıları maraqlandıran sualları cavablandırıb.
Ə.DOSTƏLİ
XQ
