Azərbaycanın Naxçıvan bölgəsində aqrar sektorun inkişaf etdirilməsi, kənd təsərrüfatı məhsullarının becərilməsinin, istehsalının və emalının innovativ üsullar əsasında təşkili aktual problemlərdən biridir. Bu baxımdan bölgədə meyvəçiliyin, tərəvəzçiliyin və üzümçülüyün genişləndirilməsi prioritet istiqmət kimi diqqət çəkir.
Muxtar respublikada meyvəçilik, tərəvəzçilik və üzümçülük sahələrinin innovativ əsaslarla genişləndirilməsi, genefondun tədqiqi, tətbiqyönümlü sortların seçilərək əkin dövrüyyəsinə daxil edilməsi, aqrotevniki qulluq işlərinin təkmilləşdirilməsi, sahələrdən yüksək maddi gəlirin əldə olunması məqsədilə yüksək ixtisalı kadrların hazırlanması bu sahələr üzrə elmi əsasların yaradıılması zərurətini ortaya qoyub. Bu baxımdan Azərbaycan Respublikası Elm və Təhsil Nazirliyi Naxçıvan Bioresurslar İnstitutunun meyvə, tərəvəz və üzümçülük laboratoriyasının rəhbəri, aqrar elmləri doktoru, dosent Varis Quliyev, baş elmi işçi dosent Loğman Bayramov və Azərbaycan Aqrar Universitetinin bağçılıq kafedrasının əməkdar müəllimi, dosent Hüseyn İdrisovun həmmüəllifi olduqları “Naxçıvanda meyvəçilik, tərəvəzçilik, üzümçülük” adlı monoqrafiyanın işıq üzü görməsu təqdirəlayiq iş kimi diqqət çəkir.
Müvafiq dövlət proqramlarını əhatə edən bu fundamental monoqrafiya giriş və meyvəçilik, tərəvəzçilik, üzümçülük sahələri üzrə 3 bölmədən ibarətdir. Praktiki əhəmiyyətli fundamental monoqrafiyada müvafiq fəsillərdə becərilən ayrı-ayrı meyvə-tərəvəz və üzüm sortları, onların tədqiq olunması, iqtisadi səmərəliliyi haqqında elmi məlumatlar, həmçinin rəngli fotoşəkillər verilib. Dərslik kimi də istifadə olunacaq bu kitabda, həmçinin Naxçıvan iqtisadi bölgəsinin aqrar sektorunda meyvəçiliyin, tərəvəzçiliyin, üzümçülüyün inkişaf tarixi, problemləri, müasir vəziyyəti, perspektivləri, becərilən sortların biologiyası və aqrotexnikası haqqında elmi və praktiki məlumatlar yer alıb.
Monoqrafiyada muxtar respublika üzrə meyvəçiliyin, tərəvəzçiliyin, üzümçülüyün sistematikası, genefond tərkibi, xəstəlik və zərərvericiləri, onlara qarşı mübarizə tədbirləri, geniş becərilən tətbiqyönümlü sortlar haqqında elmi məlumatlar öz əksini tapıb. Həm praktiki, həm də elmi əhəmiyyətli dərslik vəsaiti Azərbaycan Dövlət Aqrar Universitetinin və Naxçıvan Dövlət Universitetinin müvafiq kafedralarında, həmçinin aqraryönümlü təhsil müəssisələrinin bakalavr və magistr pillələrində kadr hazırlığı sahəsində çalışan professor, müəllim, eləcə də tələbələrin istifadəsi üçün nəzərdə tutulur. Yeni nəşrdən meyvəçilik, tərəvəzçilik, üzümçülük üzrə elmi işçilər, kənd təsərrüfatı mütəxəssisləri, fermer təsərrüfatı ilə məşğul olan sahibkarlar, fərdi torpaq sahibləri, aqronomlar və digər şəxslər də faydalan bilərlər.
Maqsud QURBANOV,
AMEA-nın müxbir üzvü, professor