2023-cü ilin 11 ayında ölkədə sığortalanmış fermer və təsərrüfatlara, ümumilikdə, 2 milyon 742 min manat ödəniş edilib. Təsərrüfatlara edilən ödənişlər həm bitkiçilik, həm də heyvandarlıq üzrə dəymiş zərərləri əhatə edir.
Aqrar Sığorta Fondunun məlumatına görə, hesabat dövründə bitkiçilik təsərrüfatları üzrə 2 milyon 44 min manat, heyvandarlıq təsərrüfatları üzrə isə 698 min manat həcmində sığorta ödənişi edilib. Xatırladaq ki, ki, Aqrar Sığorta Fondu 2021-ci ildə təsərrüfatlara dəyən zərərlər üzrə fermerlərə 1,7 milyon manat, 2022-ci ildə isə 2,3 milyon manat ödəniş edib. Yeri gəlmişkən, bu ilin 11 ayında həyata keçirilən ödənişlərin əvvəlki illərdən daha artıq olmasının səbəbi ölkədə aqrar sığorta istifadəçilərinin saynın artması, eləcə də qeyri-sabit hava şəraiti və təbiət hadisələrinin çoxalmasıdır.
Fonddan bildiriblər ki, dəyən zərərlərə görə aqrar sığorta ödənişləri yalnız sığortalı fermer və təsərrüfatlara edilir. Bu zaman fond tərəfindən əkin sahələri, bitkiçilik məhsulları, kənd təsərrüfatı heyvanları və balıqçılıq təsərrüfatları sığortalanır. Fermerlərə dəstək məqsədilə sığorta haqqının 50 faizi dövlət tərəfindən ödənilir.
XQ