Azərbaycandakı bacı və qardaşlarımızın dəstək mesajları bizi heyrətə gətirdi.
Bunu İsrailin ölkəmizdəki səfiri Corc Dik mətbuata açıqlamasında bildirib.
“Cəmiyyətin müxtəlif təbəqələrindən olan insanlardan nə qədər mesaj, e-poçt, votsap və zəng aldığımızı saymağı dayandırdım. Səfirliyin darvazası önünə gül dəstələrinin düzülməsi isə, doğrudan da, ürəkaçandır. İsrail xalqı adından Azərbaycan xalqına demək istəyirəm ki, siz bizim qəlbimizi riqqətə gətirdiniz, sağ olun!”, - deyə diplomat vurğulayıb.
***
Səfir Corc Dik son günlər ölkəsində baş verən hadisələrlə bağlı açıqlamasında bildirib ki, oktyabrın 7-si Holokostdan sonra yəhudi tarixində ən qara gün kimi yadda qalacaq. O vurğulayıb ki, HƏMAS terrorçuları İsrail vətəndaşlarını öldürmək, qaçırmaq üçün ölkənin cənubundakı şəhərlərə hücum edərək gözlənilməz müharibəyə başlayıb.
Səfir bildirib ki, baş verən hadisələr nəticəsində 700-dən çox israilli ölüb, 100-dən çox adam qaçırılıb və 2000-dən çox insan yaralanıb
“HƏMAS bir soyqırımı təşkilatıdır, onun liderləri açıq şəkildə bütün yəhudilərin öldürülməsindən danışır. Bu, onların nizamnaməsində yazılıb. Nifrət mədəniyyəti bu barbarlığın səbəbidir. Bu gün baş verənlər İsraildə görünməmiş bir hadisədir və biz bunun bir daha baş verməyəcəyinə əmin olacağıq.
İsrail ordusu HƏMAS-ın imkanlarını məhv etmək üçün dərhal bütün gücünü işə salacaq. Biz HƏMAS təhlükəsini aradan qaldıracağıq. Bu müharibədir. Təəssüf ki, bu, İsrail tarixində faciədən qalxmalı olduğumuz ilk müharibə olmayacaq.
Diplomat, eyni zamanda, beynəlxalq ictimaiyyətə müraciət edib. Səfir deyib: “Bu, xeyir ilə şərin, doğru ilə yalanın savaşıdır.
Haqq tərəfdə olduğunuzdan əmin olun və İsrailin özünü müdafiə etmək hüququnu bütün lazımi vasitələrlə dəstəkləyin.
Bu müharibə uzun sürəcək, çətin olacaq, amma biz nə etməli olduğumuzu edəcəyik və sülhü geri qazanacağıq”.
XQ