Xəbər verdyimiz kimi, Hərbi Dəniz Qüvvələri (HDQ), Quru Qoşunları (QQ), Hərbi Hava Qüvvələri (HHQ) və Dövlət Sərhəd Xidmətinin (DSX) Sahil Mühafizəsi ilə qarşılıqlı əlaqədə keçirilən “Xəzri dalğası” taktiki təlimi dünən başa çatıb.
Müdafiə Nazirliyinin mətbuat xidmətindən qəzetimizə bildirilib ki, təlimin yekun mərhələsində Xəzər dənizinin Azərbaycan Respublikasına məxsus ərazi sularında təhdid zamanı şərti düşmən gəmisinin, eləcə də hava və sahil hədəflərinin məhv edilməsi üzrə döyüş atışları icra edilib. Xilasetmə və əlverişli əməliyyat şəraitinin saxlanılması üzrə müxtəlif fəaliyyətlər də yüksək peşəkarlıqla icra olunub.
Ümumilikdə, 1500 nəfər şəxsi heyət, HDQ-nin döyüş, təminat, DSX Sahil Mühafizəsinin gözətçi gəmiləri, HHQ-nin helikopterləri, pilotsuz uçuş aparatları və QQ-nin zirehli döyüş maşınlarının cəlb olunduğu “Xəzri dalğası” taktiki təlimində qarşıya qoyulan bütün tapşırıqlar uğurla yerinə yetirilib.
“Xalq qəzeti”