AMEA-nın prezidenti, akademik İsa Həbibbəyli Bolqarıstan Elmlər Akademiyasının prezidentinin dəvəti ilə bu ölkədə səfərdədir. İ.Həbibbəyli əvvəlcə Sofiya Universitetinin Azərbaycan Dili və Mədəniyyəti Mərkəzində olub. 

Mərkəzin direktoru Sofiya Şiqaye­va-Metriska diqqətə çatdırıb ki, Universi­tetdə türkologiya və şərqşünaslıq ixtisas­ları üzrə təhsil alan tələbələrə 2013-cü ildən Azərbaycan dili, 2015-ci ildən Azər­baycan multikulturalizmi fənləri tədris olunur, yeni dərs ilindən isə Azərbaycan ədəbiyyatı fənninin tədrisinə başlanıla­caqdır.

AMEA prezidenti Akademiyanın Mil­li Arxeologiya İnstitutunun Arxeologiya Muzeyini də ziyarət edib. Muzeyin direk­toru, professor Stefan Aleksandrov mu­zey eksponatları barədə ətraflı məlumat verib. Akademik İsa Həbibbəyli dünya­nın nadir qədim insan məskənlərindən biri olan Azıx mağarası və sairə barədə söhbət aparıb və arxeologiya sahəsində mövcud əməkdaşlıq imkanlarını diqqətə çatdırıb.

Akademik İsa Həbibbəyli akademi­yanın Etnologiya və Folklor, Ədəbiyyat institutlarının rəhbərləri ilə də görüşüb. Ədəbiyyat İnstitutunun direktoru, filologi­ya elmləri doktoru Penka Vatova rəh­bərlik etdiyi elmi-tədqiqat müəssisəsinin fəaliyyəti barədə geniş söz açaraq, birgə tədqiqatların əhəmiyyətindən danışıb.

AMEA rəhbəri Nizami Gəncəvi adı­na Ədəbiyyat İnstitutunda aparılan tədqiqatlar, əldə edilən mühüm elmi nəti­cələr barədə danışıb. Azərbaycanın Şəki və Bolqarıstanın Qabrovo şəhərlərinin timsalında satira və yumor üzrə birgə tədqiqat layihəsinin mətnini təqdim edən akademik İsa Həbibbəyli layihənin əhatə dairəsi, mahiyyəti, mərhələləri və əhə­miyyətini diqqətə çatdırıb.

***

AMEA ilə Bolqarıstan Elmlər Akade­miyası arasında əməkdaşlıq müqaviləsi imzalanıb. 

Tədbirdə Bolqarıstan EA-nın prezi­denti, akademik Yulian Revalski çıxış edərək Azərbaycanla Bolqarıstan aka­demiyaları tərəfindən imzalanmış əmək­daşlıq müqaviləsinin hər iki ölkənin mü­vafiq elmi qurumları arasında əlaqələrin daha da genişləndiriləcəyinə əminliyini ifadə edib.

AMEA-nın prezidenti, akademik İsa Həbibbəyli çıxış edərək Bolqarıstanla elmi əməkdaşlıq sahəsində süni intel­lekt, elektron xidmətlər, seysmologiya, antropologiya, etnologiya, arxeologiya, ədəbi-mədəni əlaqələr və sair kimi elmi istiqamətlərin ön mövqeyə çəkiləcəyi­ni qeyd edib, müştərək elmi layihələrin müəyyən edilərək həyata keçirilməsinin əhəmiyyətindən danışıb. 

“Xalq qəzeti”