Dünən Bakıda Azərbaycan Respublikası Konstitusiya Məhkəməsinin 25 illiyinə həsr olunmuş “Konstitusiya normalarının tətbiqi vasitəsilə qanunvericiliyin inkişafı” mövzusunda beynəlxalq konfrans keçirilib. Tədbirdə Türkiyədən, Qazaxıstandan, Özbəkistandan, Rusiyadan, Albaniyadan, Belarusdan, Bolqarıstandan, Gürcüstandan, Qırğızıstandan, İndoneziyadan, Macarıstandan, Serbiyadan və Tailanddan nümayəndə heyətləri iştirak ediblər.

Konfrans iştirakçıları əvvəlcə Fəx­ri xiyabana gələrək ümummilli lider Heydər Əliyevin xatirəsini ehtiramla yad edib, məzarı önünə gül və əklil qoyub­lar. Sonra Şəhidlər xiyabanına gələn qonaqlar Azərbaycanın müstəqilliyi və ərazi bütövlüyü uğrunda mübarizədə canlarından keçmiş qəhrəman Vətən övladlarının da məzarları üzərinə tər çiçəklər düzüblər.

Konfransı açan Konstitusiya Məh­kəməsinin sədri Fərhad Abdullayev Prezident İlham Əliyevin təbrik məktu­bunu oxuyub. Dövlətimizin başçısına Konstitusiya Məhkəməsinin kollektivi və konfrans iştirakçıları adından dərin təşəkkürünü və minnətdarlığını bildirən F.Abdullayev qeyd edib ki, Prezidentin bu sahədə görülən işlərə verdiyi qiymət yüksək etimad təzahürüdür.

Daha sonra F.Abdullayev qeyd edib ki, bu il mayın 10-da ümummilli lider Heydər Əliyevin anadan olmasının 100 ili tamam oldu. Prezidentin sərəncamı ilə ulu öndərin 100 illik yubileyi mü­nasibətilə 2023-cü ilin Azərbaycanda “Heydər Əliyev İli” elan olunması dahi şəxsiyyətin əziz xatirəsinə əbədi ehtira­mın bariz nümunəsidir. 

Sədr Heydər Əliyevin müəllifliyi ilə 1995-ci il noyabrın 12-də ümumxalq səsverməsi yolu ilə müstəqil ölkəmizin ilk Konstitusiyasının qəbulu üzərində dayandı. O, referendum yolu ilə qəbul edilmiş Əsas Qanunumuzun ölkəmizdə demokratik, hüquqi dövlət, vətəndaş cəmiyyətinin yaradılmasına və hüquq sisteminin müasir tələblərə uyğun for­malaşmasına geniş imkanlar açdığı­nı vurğulayıb. F.Abdullayev bildirib ki, insan hüquq və azadlıqlarının müda­fiəsini dövlətin ali məqsədi elan etmiş Konstitusiyanın aliliyinin təmin edilmə­si, sənəddə təsbit olunmuş hüquq və azadlıqların dövlət tərəfindən müdafiəsi məqsədilə 1998-ci il iyulun 14-də Azər­baycan Respublikasının Konstitusiya Məhkəməsi yaradılıb. 

Sədr Konstitusiya Məhkəməsinin fəaliyyətindən danışaraq qeyd edib ki, qurum insan hüquq və azadlıqlarının müdafiəsi ilə bağlı missiyasını həyata keçirərkən, ilk növbədə Konstitusiyanın müddəalarını rəhbər tutur. F.Abdullayev onu da bildirib ki, rəhbərlik etdiyi ədalət məqamı 25 il ərzində 545 qərar və 160 qərardad qəbul edib. Hüquqi dövlət quruculuğuna öz töhfəsini vermiş hə­min sənədlərdə Əsas Qanunun aliliyi­nin təmin edilməsinə yönəlmiş mühüm hüquqi mövqelər əksini tapıb. 

Konstitusiya Məhkəməsi ötən müd­dətdə hüquq və azadlıqların müdafiə­si üzrə işini daim təkmilləşdirib, bey­nəlxalq təcrübəni, o cümlədən İnsan Hüquqları üzrə Avropa Məhkəməsinin presedent hüququnu, həmçinin “İnsan hüquqlarının və əsas azadlıqların mü­dafiəsi haqqında” Konvensiya və ona dair Protokolları tətbiq etməyə çalışıb. Həmçinin, xarici ölkələrin konstitusiya nəzarəti orqanları ilə, beynəlxalq təşki­latlarla əlaqələrini genişləndirib. 

Tədbirdə iştirak edən Milli Məclis sədrinin birinci müavini Əli Hüseyn­li, ədliyyə naziri Fikrət Məmmədov, Ali Məhkəmənin sədri İnam Kərimov, İnsan Hüquqları üzrə müvəkkil (ombudsman) Səbinə Əliyeva, Baş prokurorun müavi­ni Heydər Məmmədov və Vəkillər Kol­legiyasının sədri Anar Bağırov təbrik nitqləri ilə çıxış ediblər. 

Daha sonra konfransda Türkiyə Respublikası Konstitusiya Məhkəmə­sinin sədri Zühtü Arslan “Fərdi şikayət: Türkiyədə son inkişaflar”, Serbiya Res­publikası Konstitusiya Məhkəməsinin sədri xanım Snejana Markoviç “Əsas konstitusiya prinsiplərinin müdafiəsin­də Konstitusiya Məhkəməsinin rolu”, Qazaxıstan Respublikası Konstitusiya Məhkəməsinin sədri xanım Elvira Azi­mova “Qanunun aliliyi və insan hüquq­larının müdafiəsi üzrə öhdəliklərə əməl olunmasına konstitusiya nəzarətinin səmərəliliyi”, Albaniya Respublikası Konstitusiya Məhkəməsinin sədri xa­nım Holta Zaçay “Albaniya Konstitusi­ya Məhkəməsi məhkəmə islahatları və konstitusiya dəyişiklikləri fonunda - əldə edilmiş nəticə”, Bolqarıstan Respublika­sı Konstitusiya Məhkəməsinin sədri xa­nım Pavlina Panova “Ənənə və tərəqqi arasında tarazlıq”, Qırğız Respublikası Konstitusiya Məhkəməsinin sədri Emil Oskonbayev “Konstitusiya nəzarəti orqanının məhkəmə fəallığının qanun­vericiliyin inkişafına təsiri”, İndoneziya Respublikası Konstitusiya Məhkəməsi­nin sədri Anvar Usman “İndoneziyada qanunvericiliyin inkişafına töhfə veril­məsində insan hüquqlarının və qanu­nun aliliyinin rolu”, Özbəkistan Respub­likası Konstitusiya Məhkəməsinin sədri Mirza Uluqbek Abdusalomov “Özbəkis­tanda konstitusiya islahatı və konstitusi­ya nəzarətinin inkişafının yeni mərhələ­si”, Belarus Respublikası Konstitusiya Məhkəməsinin hakimi xanım Alla Bo­dak “Konstitusiya nəzarəti: qanunveri­ciliyin konstitusiyalaşdırılması”, Rusiya Federasiyası Konstitusiya Məhkəməsi­nin hakimi Qadis Hacıyev “Rusiya Fe­derasiyası qanunvericiliyinin konstitu­siya əsaslarının formalaşdırılmasında Konstitusiya Məhkəməsinin iştirakı”, Bakı Dövlət Universitetinin Əmək və ekologiya hüququ kafedrasının müdiri Alış Qasımov “Əmək məzuniyyətlərinin hüquqi tənzimlənməsi: mövcud boşluq­lar və onların konstitusiya normalarının şərhi vasitəsilə aradan qaldırılması” və Azərbaycan Respublikası Konstitusiya Məhkəməsinin hakimi Rövşən İsmayı­lov “Konstitusiya nəzarəti orqanlarının təcrübəsində qanunların konstitusiyaya uyğun təfsiri” mövzularında çıxış edərək təmsil etdikləri ölkələrdə konstitusiya ədalət mühakiməsi sahəsində mövcud təcrübəni təqdim ediblər. Məruzə və çıxışlardan sonra müzakirələr və geniş fikir mübadiləsi aparılıb.