Daşkənddə Beynəlxalq Türk Mədəniyyəti Təşkilatının 30 illiyinə həsr olunmuş tədbirlər çərçivəsində Özbəkistan Beynəlxalq Məclislər Sarayında TÜRKSOY-a üzv dövlətlərin incəsənət kollektivlərinin iştirakı ilə təntənəli konsert olub.
Tədbirdə Türk Dövlətləri Təşkilatı, Türk Dövlətləri Parlament Assambleyası, TÜRKSOY-un rəhbərləri, təşkilata üzv dövlətlərin mədəniyyət nazirləri, Özbəkistanda olan xarici ölkələrin səfirləri, diplomatlar, ölkənin elm, mədəniyyət və incəsənət xadimləri, ictimaiyyət nümayəndələri iştirak ediblər.
Azərbaycanın mədəniyyət naziri Adil Kərimli də qonaqlar arasında olub.
Əvvəlcə, Özbəkistan Prezidenti Şavkat Mirziyoyevin TÜRKSOY-un 30 illiyi münasibətilə tədbir iştirakçılarına ünvanladığı təbrik məktubu oxunub.
Daha sonra çıxış edən Özbəkistanın Mədəniyyət və turizm naziri Azadbek Nazarbekov ölkənin TÜRKSOY-dakı fəaliyyətindən söz açaraq Türk xalqlarının ortaq mədəni irsinin tədqiqi və təbliği sahəsində bu qurumun mühüm işlər gördüyünü qeyd edib.
Türk Dövlətləri Təşkilatının rəhbəri Kubanıçbay Ömüralıyev və TÜRKSOY-un baş katibi Sultan Rayev çıxışlarında ortaq Türk tarixi-mədəni irsinin qorunması və daha geniş miqyasda təbliği, üzv dövlətlər arasında əməkdaşlıq, birgə layihələrin həyata keçirilməsi kimi əhəmiyyətli məsələlərdən söz açıblar.
Sonra üzv dövlətlərin folklor kollektivləri və incəsənət xadimlərinin iştirakı ilə bədii proqram təqdim olunub.
Qulu KƏNGƏRLİ
Daşkənd