Dünən Naxçıvan Muxtar Respublikası Əmək və Əhalinin Sosial Müdafiəsi Nazirliyinin Dövlət Məşğulluq Agentliyinin təşkilatçılığı ilə Biznes Mərkəzində əmək yarmarkası keçirilib. Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəfli və digər rəsmi şəxslər yarmarkanın açılışında iştirak edib.
Səlahiyyətli nümayəndə yarmarkanın önəmini vurğulayaraq, Muxtar Respublikanın Sosial-İqtisadi İnkişafına dair (2023-2027-ci illər) Dövlət Proqramı çərçivəsində Naxçıvanda minlərlə iş yerinin yaradılmasının hədəfləndiyini də diqqətə çatdırıb. Bildirib ki, muxtar respublikada aparılan sosial-iqtisadi islahatlar nəticəsində əlverişli biznes mühiti formalaşır. Azad iqtisadi zonaya çevrilən muxtar respublikaya investorlar böyük maraq göstərirlər. Fuad Nəcəfli qeyd edib ki, bundan sonra Naxçıvanda ayda bir dəfə əmək yarmarkası keçirələcək və bu aksiya əhalinin məşğulluq imkanlarını daha da artıracaq.
Sonra səlahiyyətli nümayəndə yarmarkaya çıxarılan iş yerləri ilə tanış olub. Məlumat verilib ki, ümumilikdə, işaxtaranlara 110 müəssisədən 640 və haqqı ödənilən ictimai işlər üzrə 347 boş yer təklif olunur.
Qeyd edək ki, əmək yarmarkasında muxtar respublikada fəaliyyət göstərən 80 özəl müəssisədən 315 müxtəlif iş yeri çıxarılıb. “Naxtel” MMC tərəfindən təklif olunan iş yerləri 442 manatdan 1500 manatadək əməkhaqqı ilə işaxtaran vətəndaşlar üçün daha çox cəlbedici olub. “Cahan holdinq” isə yarmarkada müvafiq olaraq 450-1000 manat arasında əməkhaqqı ilə onlarla iş yeri təklif edib.
Səbuhi HƏSƏNOV,
“Xalq qəzeti”