Milli Məclisin Sədri Sahibə Qafarova Bəhreyn Krallığına işgüzar səfəri çərçivəsində paytaxt Manamada ASEAN Parlamentlərarası Assambleyanın baş katibi Siti Rozaimeriyanti Dato Haji Abdul Rahman ilə görüşüb. Görüşdə Azərbaycan Milli Məclisi ilə ASEAN PA arasında əməkdaşlığın yüksək səviyyədə olması vurğulanıb və ötən il Azərbaycan Milli Məclisinin ASEAN Parlamentlərarası Assambleyasında müşahidəçi statusu alması diqqətə çatdırılıb. Qeyd olunub ki, parlamentlərin təşkilata müşahidəçi statusu almaq üçün müraciətinə 2-3 il ərzində baxılır, amma Azərbaycanın müraciətinə dərhal müsbət cavab verilib.

S.Qafarova, həmçinin Qoşulmama Hərəkatının Parlament Şəbəkəsinin sədri kimi deyib ki, Parlament Şəbəkə­si ASEAN PA da daxil olmaqla digər qanunverici təşkilatla fəal əlaqə qur­maqda maraqlıdır. O, Prezident İlham Əliyevin Qoşulmama Hərəkatının Sədri kimi mühüm təşəbbüslərin beynəlxalq birlik tərəfindən dəstəkləndiyini diqqətə çatdırıb. Dövlətimizin başçısının təşəb­büsü ilə yaradılan Qoşulmama Hərəka­tı Parlament Şəbəkəsinə də beynəlxalq maraq getdikcə daha da artır. Hazırda Qoşulmama Hərəkatı Parlament Şə­bəkəsi 3 beynəlxalq parlament təşkila­tında müşahidəçi statusu alıb. Bunlar Asiya Parlament Assambleyası, İslam Əməkdaşlıq Təşkilatı Parlament İttifaqı və Ərəb Parlamentidir.

ASEAN Parlamentlərarası Assam-bleyanın baş katibi Azərbaycanın Qo­şulmama Hərəkatına uğurlu sədrliyi­ni yüksək qiymətləndirərək, həmçinin ölkəmizin hərəkatın Parlament Şəbəkə­sinin institusional inkişafı istiqamətində atdığı addımların geniş beynəlxalq icti­maiyyət tərəfindən də təqdir olunduğu­nu bildirib.

Görüşün sonunda Qoşulmama Hərəkatı Parlament Şəbəkəsi ilə ASE­AN Parlamentlərarası Assambleya ara­sında Anlaşma Memorandumu imzala­nıb.

***

Bəhreyn Krallığının paytaxtı Ma­nama şəhərində keçirilən Parlament­lərarası İttifaqın 146-cı assambleya­sında “Dinc birgəyaşayışın və inklüziv cəmiyyətlərin təşviqi: dözümsüzlüklə mübarizə” mövzusunda çıxış edən Azərbaycan Parlamentinin Sədri S.Qa­farova müasir qlobal çağırışlar kon­tekstində assambleyada müzakirə olu­nan mövzunun müstəsna əhəmiyyətini vurğulayıb. O, dünyada radikalizmin, ksenofobiyanın, irqçiliyin, islamofobiya­nın, ayrı-seçkiliyin və nifrətin artmasını keçmişdə multikulturalizm ideyalarının qəbul edilməməsi və bəzi siyasi liderlə­rin onu uğursuzluq kimi qələmə vermə­si ilə əlaqələndirib və dünyanın daha bölünmüş, dözümsüz və qeyri-sabit hala gəlməsinin onların səhv etməsinin daha bir sübutu olduğunu deyib.

S.Qafarova Ermənistanın Azərbay­can ərazilərinin 20 faizini işğal altında saxladığı müddətdə törətdiyi vəhşilik­dən, Qərbi azərbaycanlılara məxsus bütün tarixi və dini abidələri məhv et­məsindən, Azərbaycanın 2020-ci ilin noyabrında öz gücü ilə qazandığı ta­rixi Qələbədən, hazırda həmin ərazidə aparılan genişmiqyaslı yenidənqurma, tikinti-bərpa işlərindən söhbət açıb. Parlamentin Sədri , həmçinin Ermənis­tanın sülh müqaviləsini imzalamaqdan boyun qaçırmasından, regionda gər­ginlik yaratmasından da danışıb. 

Alen Simonyan cavabını aldı

Ermənistan parlamentinin sədri Alen Simonyan Parlamentlərarası İtti­faqın 146-cı assambleyasında erməni xislətinə sadiq qalaraq, Azərbaycanın ünvanına böhtanlar səsləndirib. Milli Məclisin Sədri Sahibə Qafarova Si­monyanın yalanlarını ifşa edib. O, çıxı­şında deyib ki, Ermənistanın işğalçılıq və etnik təmizləmə siyasəti nəticəsində bir milyondan çox azərbaycanlı işğal olunmuş ərazilərdən məcburi köçkün və Ermənistandan qaçqın vəziyyətinə düşüb. İşğal illərində Ermənistan bü­tün şəhər və kəndlərimizi yerlə -yeksan edib, Azərbaycanın bütün tarixi, mədə­ni və dini obyektlərini vandalizmə məruz qoyub: “Ermənistan beynəlxalq ictima­iyyəti yalan məlumatlarla çaşdırmaqla yanaşı, öz üzərinə götürdüyü öhdəlik­ləri yerinə yetirmir və Azərbaycan əra­zisinə qanunsuz şəkildə silah-sursatın, minaların daşınmasını, şəxsi heyətin rotasiyasını davam etdirir. O deyib ki, Ermənistan parlamenti sədrinin səs­ləndirdiyi fikirlər saxtakarlığın və qara­yaxmanın növbəti təzahürüdür”.

Ermənistandan qovulmuş azərbay­canlıların öz evlərinə qayıtmaq hüququ­nun olduğunu deyən Sahibə xanım bu hüququn Ümumdünya İnsan Hüquqları Bəyannaməsində və digər beynəlxalq aktlarda təsbit edildiyini vurğulayıb. 

Ermənistan parlamenti sədrinin La­çın yolunun, guya, “blokada” olunması ilə bağlı əsassız iddialarını tamamilə rədd edən S.Qafarova diqqətə çatdırıb ki, Laçın yolu bütün mülki və humanitar nəqliyyat vasitələrinin maneəsiz keçidi üçün açıqdır və bu fakt ərazidə fəaliy­yət göstərən müvafiq beynəlxalq təşki­latlar tərəfindən də təsdiq olunur.

Milli Məclisin Sədri Azərbaycanın öz üzərinə götürdüyü öhdəliklərə əməl etdiyini, eyni zamanda, öz vətəndaşla­rının hüquqlarının həyata keçirilməsini və legitim tələblərinin yerinə yetirilmə­sini təmin etmək öhdəliyinə sadiq oldu­ğunu vurğulayıb.

Əliqismət BƏDƏLOV,

“Xalq qəzeti”