“Azərişıq” ASC-dən redaksiyamıza verilən məlumata görə, əsaslı təmir və yenidənqurma işləri çərçivəsində ölkəmizin bütün regionlarında, o cümlədən qurumun Cənub Regional Enerji Təchizatı və Satışı İdarəsinə daxil olan rayonlarında elektrik şəbəkəsi yenidən qurulur.
Hazırda təmir işləri Cəlilabad rayonunun Günəşli və Axtaxana kəndlərində davam etdirilir. Zərbiəli kəndində isə işlər tamamlanmaq üzrədir. Həmin kəndlərdə 0,4 və 10 kV-luq yeni dayaqlar basdırılır, Özünüdaşıyan İzolyasiyalı Naqillər (ÖİN) çəkilir, köhnə güc mərkəzləri yeni KTM-lərlə əvəz edilir. Bundan başqa, Biləsuvar rayonunun şəhər mərkəzində, Əsgərabad və Aşağı Cürəli kəndlərində, Masallının Şərəfə, Ağakişibəyli, Babaser və Köhnə Alvadı yaşayış məntəqələrində elektrik şəbəkəsi yenidən qurulur. Rayonun ən böyük kəndlərindən biri olan Ərkivanda da yenidənqurma işlərinə start verilib.
Astaranın 1200 abonentin yaşadığı Şiyəkəran kəndində 0,4 və 10 kV-luq elektrik xətləri və dayaqlar tamamilə yenilənir. Rayonun Çayoba, Lerikin Zövnə və Züvüc kəndlərinin elektrik təsərrüfatları yenidən qurulur.
XQ