Azərbaycanın kompleks qazma və quyu xidmətlərinin idarə edilməsi şirkəti “SOCAR AQŞ” MMC-nin törəmə müəssisəsi olan “SOCAR AQŞ Sondaj Mühendislik Sanayi ve Ticaret A.Ş” (“SOCAR AQŞ Türkiyə”) “Türkiyə Petrolları Anonim Ortaqlığı” (TPAO) şirkəti ilə qazma xidmətləri üzrə mühüm müqavilə imzalayıb.
Müqaviləyə əsasən, “SOCAR AQŞ Türkiyə” qardaş ölkənin cənub-şərq bölgəsində quruda yerləşən dörd neft quyusu üçün qazma xidmətləri göstərəcək. Bu müqavilə enerji sektorunda strateji tərəfdaşlığı təmsil edən hər iki qurum üçün mühüm nailiyyətdir. Sazişin Türkiyənin ümumi neft hasilatını dəstəkləyəcəyi və regionda məşğulluğu artıracağı gözlənilir.
Əlamətdar hadisəni şərh edən “SOCAR AQŞ”nin baş direktoru Samir Mollayev bildirib ki, “SOCAR AQŞ Türkiyə” zəngin təcrübəsindən, müasir texnologiyalardan istifadə edərək layihə zamanı təhlükəsiz və səmərəli fəaliyyət göstərməyi və maksimum məhsuldarlığı təmin etməyi qarşısına məqsəd qoyub.
“SOCAR AQŞ Türkiyə” və TPAO arasında olan bu tərəfdaşlığın regionun enerji sənayesinin inkişafını dəstəkləmək üçün qarşılıqlı öhdəliyə əsaslandığını vurğulayan “SOCAR AQŞ Türkiyə”nin meneceri Famil Xələfov isə deyib ki, əldə olunmuş texniki təcrübədən istifadə hər iki tərəfə uğur gətirəcək, uzunmüddətli əlaqələri inkişaf etdirməyə töhfə verəcək.
“Xalq qəzeti”