1400 belə təsərrüfatın müraciətinə də baxılır
Azərbaycanda qeyri-sabit hava şəraiti kənd təsərrüfatına ciddi zərər vurmaqdadır. Cari ilin may ayında dolu yağması nəticəsində Şamaxıda yerləşən böyük üzüm sahəsinə ciddi ziyan dəyib.
Aqrar Sığorta Fondundan verilən məlumata görə, təbiət hadisəsi nəticəsində zərər çəkən üzüm bağı sığortalı olduğu üçün dəymiş ziyan fond tərəfindən ödəniləcək. Bu məqsədlə hadisə barədə fonda məlumat daxil olan kimi mütəxəssislər və müstəqil aqrar sığorta ekspertləri sahəyə gələrək ilkin araşdırma aparıb, dəymiş zərərin məbləğinin hesablanmasını həyata keçiriblər.
Qeyd olunub ki, iyul ayında isə Aqrar Sığorta Fondunun mütəxəssisləri və müstəqil aqrar sığorta eksperləri sahəyə gələrək yekun ekspertiza keçiriblər. Fonddan verilən məlumatda, həmçinin bildirilir ki, araşdırma prosesinə yerli və Türkiyədən gələn ekspetlər cəlb olunub. Zərərin məbləği dəqiqləşəndən sonra təsərrüfata dəyən zərərin ödənilməsinə başlanılacaq.
Xatırladaq ki, sözügedən təsərrüfat bundan əvvəl də – 2018-ci ildə dolunun təsirinə məruz qaldığından böyük zərərlə üzləşib. Bunu nəzərə alaraq ölkədə aqrar sığortanın tətbiqindən sonra təsərrüfat mütəmadi olaraq sığortalanıb. Yeri gəlmişkən, dolu Azərbaycanda əkin sahələrinə ən çox zərər yetirən təbiət hadisələrindəndir. Təkcə onu qeyd etmək kifayətdir ki, 2023-cü ilin ilk 6 ayında Aqrar Sığorta Fonduna əkin sahələrinə dəyən zərərlərlə bağlı 7 min müraciət daxil olub ki, bunun da 1400-ü və ya hər 5 müraciətdən 1-i dolu hadisəsi ilə əlaqədardır. Ümumilikdə isə, son 3 ayda qeyri-sabit hava şəraiti ilə bağlı fonda edilən müraciətlərin sayı 1000-i keçib. Hazırda həmin təsərrüfatlara dəymiş zərər qiymətləndirilir və bu proses başa çatdıqdan sonra kompensasiya ödənişlərinə başlanılacaq. Bütün bunlar isə ölkəmizdə 2020-ci ildən tətbiq edilən aqrar sığortanın əhəmiyyətini bir daha təsdiq edir.
Xatırladaq ki, hazırda aqrar sığorta 41 bitki növü üzrə 29 riskdən təminat verir. Bura təbiət hadisələri–fırtına, qasırğa, sel, subasmalar, daşqınlar, eləcə də üçüncü şəxslərin hərəkətləri, bitki xəstəlikləri, zərərvericilər və insan amilindən asılı olmayan müxtəlif hadisələr aiddir. Fonddan bildirilib ki, aqrar sığorta güzəştli şərtlərlə təqdim edilir. Belə ki, fermerlərə dəstək məqsədilə sığorta haqqının 50 faizi dövlət tərəfindən ödənilir.
Yeri gəlmişkən, bu ilin ötən 7 ayında ölkəmizdə kənd təsərrüfatı bitkilərinin sığorta yığımları 11 milyon 85 min manat təşkil edib. Azərbaycan Mərkəzi Bankının məlumatına görə, bu göstərici 2022-ci ilin müvafiq dövrü ilə müqayisədə 2,5 dəfə və ya 6 milyon 692 min manat çoxdur. Xatırladaq ki, ötən ilin yanvar-iyul aylarında kənd təsərrüfatı bitkiləri üzrə sığorta yığımları 4 milyon 392,5 min manat təşkil edib.
“Xalq qəzeti”