Xəbər verildiyi kimi, iyulun 5–6-da Avstriyanın paytaxtı Vyana şəhərində Neft İxrac Edən Ölkələr Birliyinin (OPEC) “Dayanıqlı və inklüziv energetika keçidinə doğru” mövzusunda 8-ci beynəlxalq seminarı keçirilib.
Tədbirdə ölkəmizi Azərbaycan Respublikasının energetika naziri Pərviz Şahbazov təmsil edib. Sessiyanın iştirakçıları siyahısında, həmçinin 2023-cü ildə OPEC konfransının prezidenti, Ekvatorial Qvineyanın mədənçilik və karbohidrogenlər naziri Antonio Oburu Ondo, Birləşmiş Ərəb Əmirliklərinin (BƏƏ) energetika və infrastruktur naziri Suhail bin Məhəmməd əl Mazrui və nigeriyalı nümayəndə (daimi nümayəndə, Nigeriyanın Neft Ehtiyatları Nazirliyi) Qabriel Tanimu Aduda yer alıblar.
“Dayanıqlı və inklüziv enerji keçidinə doğru” mövzusunda keçirilən 8-ci OPEC beynəlxalq seminarında çıxış edən energetika naziri Pərviz Şahbazov son illərdə neft-qaz sektoruna investisiyaların azalmasını bazarda sabitlik və dayanıqlı enerji təhlükəsizliyi üçün başlıca risklərdən biri kimi qiymətləndirib. Qeyd olunub ki, hazırkı 100 trilyon dollarlıq qlobal iqtisadiyyatın istifadə etdiyi enerjinin 80 faizindən çoxu karbohidrogenlərin payına düşür. Bu asılılığa isə qısa müddətdə yüksək ambissiyalı siyasi qərarlarla tamamilə son qoymaq qeyri-realdır. Qarşıdakı onilliklərdə ətraf mühiti qorumaqla enerji təhlükəsizliyini, ədalətli, inklüziv enerji keçidini təmin etmək üçün rasional qərarlara və təxirəsalınmaz tədbirlərə ehtiyac duyulduğunu diqqətə çatdıran P.Şahbazov deyib ki, enerji bazarlarının iştirakçıları arasında dialoq və əməkdaşlıq olmadan bu məqsədə çatmaq mümkün deyil.
Energetika naziri, həmçinin Azərbaycanın hazırda enerji təhlükəsizliyindəki rolunu bir neçə enerji resursu üzrə şaxələndirməsindən, ötən il Cənub Qaz Dəhlizi ilə Avropaya qaz tədarükünün 40 faiz artırılması ilə təbii qazın enerji böhranının həllinə töhfələrindən bəhs edib. O deyib ki, bizim məqsədimiz hər hansı bir enerji növünün təşviqi deyil, bütün enerji növlərindən doğru istifadə etməklə enerji təhlükəsizliyinə, iqtisadi inkişafa və sabitliyə töhfə verməkdir: “Biz inklüziv enerji keçidini dəstəkləyirik. Lakin emissiyaların azaldılmasında mühüm rol oynayan “yaşıl enerji”nin dayanıqlığını təmin etmək, bərpa olunan enerjini dəstəkləmək, rəvan enerji keçidi üçün bizim qaza ehtiyacımız var. Hesab edirəm ki, gecikmədən birgə hərəkət etmək vaxtıdır. Gəlin, ayrı-ayrılıqda deyil, birgə, dialoq mühitində enerji bazarlarının inkişafı ilə bağlı doğru qiymətləndirmələr aparaq, gələcək qarşısında məsuliyyətimizi bərabər səviyyədə paylaşaq. Həm qlobal neft bazarının davamlı balanslaşdırılmasının etibarlı qarantı olan “OPEC plus” ölkəsi, həm də Avropanın etibarlı enerji tərəfdaşı olaraq Azərbaycan belə bir dialoqa töhfə verməyə hazırdır”,–deyə nazir Pərviz Şahbazov əlavə edib.
Energetika Nazirliyindən aldığımız məlumata görə, nazir Pərviz Şahbazov Vyanada bir sıra vacib görüşlər də keçirib. Birləşmiş Ərəb Əmirliklərinin enerji və sənaye naziri Süheyl Məhəmməd əl-Məzrui ilə görüşdə Əbu-Dabi Milli Neft Şirkəti (ADNOC), “Masdar” və “TAQA” şirkətləri ilə neft-qaz və bərpaolunan enerji sektorlarında, həmçinin qlobal neft bazarının tənzimlənməsində əməkdaşlığa dair məsələlər müzakirə edilib. Görüşdə, həmçinin BƏƏ ilə Azərbaycanın “yaşıl enerji” tərəfdaşlığından məmnunluq ifadə olunub. Tezliklə istismara veriləcək 230 meqavat gücündə “Qaradağ” Günəş Elektrik Stansiyası, həmçinin quruda və dənizdə 4 qiqavat gücündə “yaşıl enerji” layihələrinin icrası ilə bağlı cari vəziyyət nəzərdən keçirilib.
İraqın Baş nazirinin müavini, neft naziri Hayan Əbdül-Qani ilə görüşdə isə ölkələrimizin qlobal neft bazarının sabitləşdirilməsi məqsədilə “OPEC plus” formatında uğurlu əməkdaşlıq həyata keçirdiyi bildirilib. SOCAR tərəfindən İraq mənşəli xam neft və neft məhsullarının dünya bazarına təchizatından bəhs edilib. Görüşdə, həmçinin iki ölkə arasında enerji əməkdaşlığının inkişafı üçün “Energetika Nazirliyi ilə İraq Respublikasının Neft Nazirliyi arasında neft və qaz sahələrində əməkdaşlıq haqqında Anlaşma Memorandumu”nun imzalanmasının əhəmiyyətindən danışılıb. Qeyd olunub ki, İraq Azərbaycanla neft-qaz sahəsində intensiv əməkdaşlıqda maraqlıdır.
“Dayanıqlı və inklüziv energetika keçidinə doğru” mövzusunda 8-ci beynəlxalq seminar çərçivəsində nazir Pərviz Şahbazov OPEC-in Baş katibi Haysam Əl-Qays ilə də görüşüb. Görüş zamanı qlobal neft bazarının balanslaşdırılması istiqamətində atılan addımlardan və neft sənayesinin inkişafı ilə əlaqədar məsələlərdən bəhs olunub. Gələcəkdə enerji təhlükəsizliyinin təminatı məqsədilə bütün tərəflərin cəlb edildiyi dialoq və əməkdaşlıq mühitinin yaradılmasının zəruriliyi qeyd olunub.
Energetika Nazirliyinin məlumatına görə, nazir Pərviz Şahbazov Vyana səfəri çərçivəsində Avropa İttifaqının energetika məsələləri üzrə komissarı Kadri Simson və “Total Energies” şirkətinin sədri və baş icraçı direktoru Patrik Puyane ilə də görüşüb.
Avropa İtttifaqının energetika məsələləri üzrə komissarı Kadri Simson ilə görüşdə “Azərbaycan ilə Avropa İttifaqı arasında enerji sahəsində Strateji Tərəfdaşlığa dair Anlaşma Memorandumu”nun icrası, həmçinin enerji təhlükəsizliyi və enerji keçidinin uğurla həyata keçirilməsi məqsədilə müxtəlif bazar iştirakçılarının təmsil olunduğu enerji dialoqu platforması üzrə əməkdaşlıq imkanlarına dair fikir mübadiləsi aparılıb. Görüş zamanı Cənub Qaz Dəhlizinin genişləndirilməsi, həmçinin Avropa ərazisində boru kəmərləri infrastrukturunun qurulması istiqamətində cari vəziyyət nəzərdən keçirilib və proseslərin sürətləndirilməsi üçün səylərin gücləndirilməsinin vacibliyi bildirilib.
“Total Energies” şirkətinin sədri və baş icraçı direktoru Patrik Puyane ilə görüşdə isə “Abşeron” qaz-kondensat yatağının işlənilməsi, ümumi gücü 500 meqavat olan günəş və külək layihələrinin həyata keçirilməsi ilə bağlı məsələlər müzakirə edilib. Azərbaycanın “yaşıl enerji” kursunun həyata keçirilməsində “Total Energies” ilə əməkdaşlığın əhəmiyyəti vurğulanıb və bu aspektdə, 250 meqavat gücündə külək, Naxçıvanda 250 meqavat gücündə günəş elektrik stansiyaları, habelə enerji saxlanc sistemləri layihələrinin həyata keçirilməsinin “yaşıl enerji” əməkdaşlığına töhfə verəcəyi qeyd edilib.
Bütövlükdə isə, OPEC-in 8-ci beynəlxalq seminarında energetika keçidi ilə bağlı enerji təhlükəsizliyi, texnoloji innovasiyalar, ekoloji məsələlər, davamlı inkişaf, enerji siyasəti, eləcə də qlobal iqtisadiyyatda genişmiqyaslı tendensiyalar kimi əsas məsələlər müzakirə olunub.
Mirbağır YAQUBZADƏ, “Xalq qəzeti”
