Formula 1 Azərbaycan Qran-Prisində qadın marşalların fəaliyyəti də diqqət mərkəzində olub. Onların fəal rolunu nəzərə alaraq yarış zamanı Bakı Şəhər Halqasının həlledici, 16.2-ci döngəsində “Qadın marşal postu” fəaliyyət göstərib.
Artıq üçüncü ildir ki, tətbiq edilən bu təşəbbüslə qadın marşallar yarış əməliyyatlarında ön sıralarda olur ki, bu da yeniliyə və tədbirin əhəmiyyətli məqamına çevrilir. Bakı Şəhər Halqası Əməliyyat Şirkətinin baş direktoru Maqsud Fərzullayev və Azərbaycanda səfərdə olan Beynəlxalq Avtomobil Federasiyasının prezidenti Məhəmməd Ben Sulayem qadın marşallarla görüşüb.
M.Fərzullayev qadın marşallarımızın 16-cı döngədə yerləşən postunun yarışın gələcəyində onların töhfələrinin nə qədər vacib olduğunu göstərdiyini deyib:
– Qadınları belə mühüm bir posta yerləşdirməklə, biz, sadəcə, onların nailiyyətlərini qeyd etmirik, eyni zamanda, daha inklüziv və dinamik bir idman üçün yol açırıq. Qlobal miqyasda motoraport inkişaf etdikcə, Bakı Şəhər Halqasının “Qadın marşal postu” bu idmanın müxtəlifliyi qəbul etdiyini və qadınlar üçün daha çox imkanlar yaratdığını nümayiş etdirir.
FIA prezidenti Azərbaycan Avtomobil Federasiyası və Bakı Şəhər Halqası Əməliyyat Şirkətinin qadınların idmandakı nüfuzunun artması üçün bu cür təşəbbüslə çıxış etməsinin qürurverici olduğunu diqqətə çatdırıb:
– Bərabərlik, müxtəliflilik və inklüzivlik siyasəti FIA-nın başlıca qayəsi olmaqla, qadınların idarəçilik mövqeyinin artmasına töhfə vermək vacib məqsədlərimizdəndir. Ümid edirəm ki, Bakı yarışının qadın marşalları idman dünyası üçün yeni ilham mənbəyi olacaq.
L.AZAD
XQ
