Bu gün medal ümidlərimizdən biri olan boksçumuz Alfonso Dominqes (92 kq) ¼ final qarşılaşmasına çıxacaq.
Boksçumuz yaxşı formada olduğunu elə ilk qarşılaşmada nümayiş etdirib. O, 1/8 final mərhələsində ikiqat Olimpiya çempionu Xulio Sesar Kruz (Kuba) kimi çətin rəqibi mübarizədən kənarlaşdırıb. Rinq ustası müsahibələrinin birində Paris Olimpiadasında favoritlər arasında məhz Xulio Sezar La Kruzun adını çəkmiş, eyni zamanda, ispaniyalı və italiyalı boksçuların güclü olduqlarını bildirmişdi. Artıq ilk görüşü müvəffəqqiyyətlə başa vuraraq növbəti mərhələyə vəsiqə qazanan rinq ustasının uğurla irəliləməsi üçün yetərincə potensialı var. Boksçumuz yarışda çıxışını şərh edərkən belə deyib:
– Bu son deyil, qarşıda döyüşlər var. Daha da irəli getmək lazımdır.
Tokio Olimpiadasında bürünc medal qazanan Alfonso Dominqes Olimpiya tsiklində böyük nailiyyətlər əldə edib. O, 2021-ci ildə karyerasında ilk dəfə dünya çempionu titulunu qazanıb. Ötən il Daşkənddə keçirilən dünya çempionatında gümüş medala sahib olub. Bugünkü döyüşdə onun rəqibi Aybek Oralbay (Qazaxıstan) olacaq.
İnanırıq ki, boksçumuz Olimpiya zirvəsinə yüksələcək!
