Hər bir şəhid xalqımızın unudulmaz qəhrəmanıdır. Vətənin azadlığı uğrunda canını qurban verən igid oğul və qızlarımızın yaddaşlarda əbədi həkk olunduğunu göstərmək, uşaqlar arasında vətənpərvəliyi təbliğ etmək, qəhrəmanlarımızı tanıtmaq məqsədilə ölkəmizdə mütəmadi olaraq, xatirə turnirləri təşkil edilir.
Azərbaycan Əsəd Döyüş Növləri Mərkəzinin təşkilatçılığı ilə Vətən müharibəsi şəhidi Saleh Məcidzadənin xatirəsinə həsr edilmiş “Gənc aslanlar”ın 24-cü turniri də xüsusi önəm kəsb edən tədbirlərdəndir.
AFC (Əsəd döyüş çempionatı) yarışına müxtəlif yaş qrupları üzrə qatılan idmançıların hər biri mübarizliyi, döyüş ruhu ilə fərqlənmək istəyirdilər. Gənc aslanlar arasında 15-16 yaş kateqoriyasında mükafat qazananlardan biri də Məhəmməd Məmmədli olub.
Xırdalan şəhər M.Adıgözəlov adına 4 nömrəli tam orta məktəbin şagirdi əzmkarlığı və döyüş bacarığı ilə bu turnirdə də xüsusilə seçilib. Yarışda öz çəkisində II yeri qazanan yeniyetmə idmançı qəzetimizə açıqlamasında məhz şəhidin əziz xatirəsinə həsr olunmuş turnirdə medal qazandığı üçün sevindiyini bildirdi:
– Yarışlarda tez-tez iştirak edirik. Amma şəhid Saleh Məcidzadənin xatirəsinə həsr edilmiş “Gənc aslanlar” turnirinin bizim üçün böyük önəmi var. Saleh Məcidzadə də idmançı olub. Onun qəhrəmanlığı bizim üçün əsl örnəkdir. Biz də onun kimi güclü idmançı, xalqımızı, dövlətimizi qoruyan qəhrəman əsgər olmaq arzusundayıq. “Gənc aslanlar”ın mükafatçıları sırasında yer aldığım üçün çox məmnunam.
Məhəmmədin şəxsi məşqçisi peşəkar döyüşçü Turan Əhmədovdur. MMA (qarışıq döyüş sənəti) üzrə 2018-ci ildən məşğul olur. Peşəkar karyerası ərzində artıq 5 döyüşün 4-də qələbə qazanıb. Bu turnirdə iştirak edən 13 yetirməsindən 10-u qızıl, 3-ü gümüş medal qazanıb. Məhəmməd Məmmədlidən söz düşəndə T.Əhmədov şagirdinin istedadlı döyüş ustası kimi yetişəcəyinə əmin olduğunu dedi:
– Xatirə turnirində iştirak edən yeniyetmələrin hər biri sonacan mübarizə apardı. Onlar möhkəm iradə, yüksək dözümlülük nümayiş etdirdilər. Gələcəyimiz olan gənc nəslin fiziki cəhətdən güclü yetişməsi ilə yanaşı, Vətənə, xalqa böyük sevgi ruhunda formalaşması da bizim üçün çox önəmlidir. Məhəmməd də yaşıdları kimi xatirə turnirində əsl döyüşçü ruhu ilə mübarizə apardı.
Adına xatirə turniri keçirilən şəhid Saleh Məcidzadəyə gəldikdə isə o, 1994-cü il iyulun 16-da Biləsuvar rayonunun Nəsimikənd kəndində anadan olub. Universal idman növü üzrə qatıldığı bütün yarışların qalibləri sırasında yer alıb.
2015-ci ildə həqiqi hərbi xidmətə çağırılıb, Qusar rayonunda kəşfiyyat bölməsində xidmət edib. 2017-ci ildən xüsusi təyinatlı qüvvələrdə gizir kimi hərbi xidmətini davam etdirib. Saleh 2016-cı il Aprel döyüşlərində və Tovuzda düşmən diversiya qrupunun məhv edilməsində iştirak etdiyinə görə komandanlıq tərəfindən təltif edilib. 2020-ci il oktyabrın 11-də Cəbrayıl rayonunun Daş Veysəlli kəndinin düşməndən azad olunması zamanı şəhid olub.
“Azərbaycan Bayrağı” ordeni, “Vətən uğrunda”, “Füzulinin azad olunmasına görə”, “Kəlbəcərin azad olunmasına görə” medalları ilə təltif edilib.
Əlbəttə, belə bir qəhrəmanın xatirə turnirində uğur qazanmaq, elə qəhrəmanın yolunu davam etdirməkdir. Yolun uğurlu, qələbən bol olsun Məhəmməd!
L.AZAD
XQ
