“COP29 QHT Koalisiyası”nın “Zoom” vasitəsilə ikinci hibrid görüşü keçirilib. Tədbirdə inklüzivlik mövzusunda xarici və yerli vətəndaş cəmiyyəti təmsilçiləri geniş müzakirələr aparıb.
Görüşə Azərbaycan Milli QHT Forumunun dəvəti ilə COP29-da BMT-nin İqlim dəyişikliyi üzrə yüksək səviyyəli çempionu Nigar Arpadarai və COP29-un gənc iqlim çempionu Leyla Həsənova qonaqlar qismində qatılıblar. Təmsilçilərimiz onlara ünvanlanan sualları cavablandırıblar.
Qeyd edək ki, bugünlərdə “COP29 QHT Koalisiyası”na daha 9 ölkədən 15 xarici QHT qoşulub. Hazırda “COP29 QHT Koalisiyası”nda 39 ölkədən 123 xarici QHT təmsil olunur. Azərbaycan QHT-lərini isə koalisiyada milli çətir təşkilat olan Azərbaycan Milli QHT Forumu təmsil edir.
Forumun İdarə Heyətinin sədri Ramil İskəndərli bildirib ki, son günlər Norveç, İspaniya, Rumıniya, Şri-Lanka və digər ölkələrdən də xarici QHT-lər Koalisiyaya qoşulub. Hazırda müraciətlərin davam etdiyini bildirən R. İskəndərli “COP29 QHT Koalisiyası”nı çox unikal bir platforma kimi dəyərləndirib. Onun sözlərinə görə, BMT-nin İqlim Dəyişmələri üzrə Çərçivə Konvensiyasının Tərəflər Konfransında müşahidəçi statusa malik QHT-lərin birləşdiyi 9 həmfikir qrupdan olan 39 QHT də sözügedən koalisiyada təmsil olunur.
