Avstraliyada son həftələrdə elan edilən böyük büdcə ixtisarları nəticəsində bu ölkənin yeddi universitetində mindən çox iş yeri itirilə bilər.
AZƏRTAC xəbər verir ki, Avstraliya hökuməti kirayə qiymətlərinin artmasına səbəb olan rekord miqrasiyanın qarşısını almağa çalışdığı üçün 2025-ci ildə yeni əcnəbi tələbələrin sayını 270 minə endirməklə bağlı qanunun qəbul edilməsini gözləyir.
“The Guardian” nəşri yazır ki, universitetlər artıq beynəlxalq tələbələrə təzyiqin təsirini hiss edirlər. Avstraliya Milli Universitetinin baş icraçı direktoru Lyuk Şihi xəbərdar edir ki, davam edən immiqrasiya islahatları artıq iqtisadiyyata 4,3 milyard dollara başa gəlib. O, bu siyasətin davamının universitetlərdə 14 min iş yerini riskə atacağını proqnozlaşdırır.
Artıq Kvinslend, Kanberra və Yeni Cənubi Uelsdəki universitetlər ciddi maliyyə problemlərinin qarşısını almaq üçün böyük struktur dəyişikliyinin bir hissəsi kimi son bir ay ərzində işçilərin ixtisarını elan ediblər.
Universitetlər davam edən maliyyə təzyiqlərinə, o cümlədən federal hökumətin immiqrasiya qanunlarına edilən son dəyişikliklərə istinad edirlər ki, bu tədbirlər ali təhsil vizalarının 60 minə qədər azalması ilə nəticələnib.
Avstraliya Milli Universitetinin sözçüsü universitetin fəaliyyət mühitinin əhəmiyyətli dərəcədə dəyişdiyini və büdcə kəsirlərinin artıq tələbə qəbulu gəlirlərini artırmaqla qarşılana bilməyəcəyini bildirib.
Beynəlxalq təhsil 2022-2023-cü illər üçün büdcədə Avstraliya iqtisadiyyatına 24,7 milyard dollar töhfə verib. Lakin sorğuların nəticələri göstərir ki, respondentlər əcnəbi tələbə və işçilərin böyük axınının mənzil bazarına həddindən artıq təzyiq göstərməsindən və immiqrasiyanı bir ildən az müddətdə növbəti federal seçkilərdə potensial əsas döyüş meydanına çevirməsindən narahatdırlar. Hökumət artan immiqrasiyanın qarşısını almaq məqsədilə keçən ay əcnəbi tələbələr üçün viza rüsumlarını iki dəfədən çox artırıb və onların ölkədə qalma müddətini daim uzatmağa imkan verən qaydalardakı boşluqları aradan qaldıracağını vəd edib.
