“Minsk İrəvan ilə əməkdaşlığa və onlara kömək etməyə hazırdır, amma Ermənistan Avropa İttifaqına qoşulmaq istəyir”. Bu barədə Belarus Prezidenti Aleksandr Lukaşenko respublikada yaşayan müxtəlif millətlərin nümayəndələri ilə görüşdə bildirib.
Belarus lideri İrəvan ilə münasibətlərin pisləşməsində Minskin günahı olmadığını vurğulayıb: “Yaxşı olardı ki, bütün çatışmazlıqlara və nüanslara baxmayaraq, əvvəlki kimi Ermənistanla yaxşı münasibətlər quraq. İnanın ki, bu, qətiyyən bizim günahımız deyil. Biz ermənilərə kömək etməyə çalışdıq, əməkdaşlıq etdik və dəstək verdik. Lakin görünür, Qərbə, Avropa İttifaqına getmək istəyirlər".
Dövlət başçısı daha sonra deyib: “O hansı Qərbdir? Qərblə, amerikalılarla əməkdaşlığa qarşı deyilik, amma onların siyasətini görürsünüz... Sabah ABŞ-də hakimiyyətə yeni rəhbərlik gələrsə, siyasət tamamilə fərqli olacaq. Onların vərdişləri belədir: “Sən kimsən? Biz sizi tanımırıq! Bu, onların siyasətidir. Onlara etibar etmək olmaz. Ermənilər ağıllı insanlardır. Yaxın gələcəkdə onlar xoşbəxtliyin harada olduğunu anlayacaqlar”.
Lukaşenkonun bildirdiyi kimi, Qərbdə Ermənistana yalan vədlər verməklə onu fəlakətə sürükləyirlər. Bu ölkəni Avropa İttifaqına üzvlüyə qəbul etmək bir yana qalsın, hər vəchlə Cənubi Qafqazda sülh prosesinə əngəl törətməyə çalışırlar. Aydın görünür ki, regionda gedən sülh prosesləri Qərbin müxtəlif strukturlarını, eləcə də Brüsseldə oturan Avropa Şurasının siyasətçilərini qane etmir. Bu səbəbdən də bölgədə təxribata, gərginliyə yönəlik addımlar atırlar. Aİ Ermənistandakı mülki missiyasının sayını artırır. Bunun arxasında Aİ-nin məkrli planları gizlənir.
Fransanın Ermənistanı silahlandırması da bu siyasətin tərkib hissəsidir. Paris yeni eskalasiya və gərginlik ocağı yaratmağa çalışır. Bu məqsədlə Paris Ermənistana satdığı silah-sursatın çeşidini genişləndirir, ölkə rəhbərliyini revanşizmə təşviq edir. Ermənistanın müdafiə naziri Suren Papikyanın Fransaya səfəri zamanı iki tərəf arasında “CAESAR” özüyeriyən artilleriya sistemlərinin alınmasına dair müqavilə imzalanıb. “CAESAR”ları satın almaqla Ermənistan, əslində, Azərbaycanla yeni savaşa hazırlaşdığını, Fransa isə bu silahları satmaqla rəsmi İrəvanı müharibəyə hazırladığını gizlətmir.
Bu razılaşma Ermənistanın Fransadan 3 ədəd GM200 radar sistemi, 50 ədəd “Bastion” tipli zirehli texnika satın alması və “Mistral” qısamənzilli hava hücumundan müdafiə sistemlərinin gələcəkdə alınmasına dair imzaladığı müqavilə ilə başlanan revanşa hazırlıq prosesinin tərkib hissəsi sayılmalıdır.
Bu azmış kimi, Hindistan Parisin köməyi və rəsmi icazəsi ilə “Trayan” özüyeriyən artilleriya sistemlərini Ermənistana çatdıracaq. Söhbət “Nexter systems” və “Sezar” özüyeriyən artilleriya sistemlərinin hind analoqundan gedir. Razılaşmanın icrasını gizlətmək üçün 155 mm/52 kalibrli silahların birbaşa uçuşlarla deyil, əvvəlcə İran ərazisinə, sonra isə quru yol ilə Ermənistana çatdırılması planlaşdırılır. Budur Qərbin Ermənistana vəd etdiyi üstünlüklər və Ermənistanın Qərbə meyillənməsinin səbəbi?! İrəvan daha böyük maliyyə dəstəyinə də ümid edir. Qərbdə isə havayı pul verən yoxdur.
Bəs Ermənistan silahlanmaqla nəyə nail olmaq istəyir? Bu barədə Plexanov adına Rusiya İqtisad Universitetinin müəllimi, hərbi politoloq Aleksandr Perendjiyev bildirib ki, Ermənistan Qərbdən, sadəcə, yeni silahlar almır, həm də Ukraynaya öz köhnə sovet silahlarını ixrac edir. Bununla da Kiyevə Rusiyaya qarşı mübarizədə kömək edir: “Söhbət Ermənistanda silahların artırılmasından yox, yenidən silahlanmadan gedir. Sovet silahları əvəzinə, Qərb silahları alınır. Üstəlik, burada anti-Azərbaycan deyil, Rusiya əleyhinə çox şeylər var. Çünki bu yaxınlarda Ermənistandan xeyli sovet silahı Ukraynaya gətirilib. Bu, ABŞ-nin əmri ilə edilir. Qərb silahları İrəvana çatdırılır”.
Aleksandr Perendjiyev sonra vurğulayıb: “Yəni bizim və Bakının da gördüyü silah tədarükü sovet silahlarını Ukraynaya verdiyinə görə Ermənistana vəd edilən Qərb təzminatıdır. Paşinyan heç nə ödəməli olmadığına görə, bununla razılaşıb. O, Qərb kuratorlarının göstərişlərinə əməl edir”.
Hərbi politoloq onu da qeyd edib ki, Azərbaycan ordusunu ardıcıl olaraq gücləndirir. Hələ də regionun əsas hərbi qüvvəsidir və Ermənistanın Cənubi Qafqazın təhlükəsizliyini təhdid etmək cəhdlərinin qarşısını almağa qadirdir: “Qərbin bu silah təzminatı müəyyən mənada Ermənistan ordusunu gücləndirir, lakin o qədər yox ki, Azərbaycan mövqelərinə hücum etsin və Azərbaycan ordusundan güclü olsun. Fransa Azərbaycanın əl-qolunu sallayıb gözləməyəcəyini yaxşı bilir. Bakı da cavab addımları atır. Azərbaycan ordusu Ermənistan ordusundan çox güclüdür. İndiyədək Ermənistanın malik olduğu hərbi güc Azərbaycan ordusuna müqavimət göstərmək üçün yetərli deyil”.
Beləliklə, Fransa öz hərəkətləri ilə regionu yeni hərbi eskalasiyaya sövq edir, Ermənistanı fəlakətə sürükləyir. Qərbin hərbi yardımının sonu Ermənistan üçün yeni məğlubiyyətdir.
Pünhan ƏFƏNDİYEV
XQ
