Hindistanın baş naziri Narendra Modi bildirib ki, Hindistan İsveçrədə Ukrayna üzrə konfransda iştirak etmək niyyətindədir. İştirak səviyyəsi, eləcə də baş nazirin sammitdə şəxsi iştirakı vaxt və maddi-texniki təchizatdan asılı olacaq.

Narendra Modi yerli KİV-ə müsahibəsində “Hindistan qlobal sülh, təhlükəsizlik və inkişafın gündəmini irəli sürən bütün mühüm sammitlərdə iştirak edəcək” deyib. O, Hindistan gələn ay keçiriləcək G7 toplantısında və Ukrayna sülh sammitində iştirak etmək üçün dəvət aldığını bildirib.

Eyni zamanda, Narendra Modi deyib ki, Hindistan sammitdə qlobal diskursu formalaşdırmaq və “insan mərkəzli inkişaf və firavan və dinc dünya vizyonunu təşviq etmək” üçün “Qlobal Cənubun səsini dəstəkləyəcək”.

Hindistan konfransda iştirakını təsdiqləyən yeganə Qlobal Cənub ölkəsidir. Braziliya və Cənubi Afrika liderləri daha əvvəl sammitdə iştirak etməyəcəklərini bildiriblər. Çin də açıq şəkildə bildirib ki, sammitin İsveçrədə keçirilməsini dəstəkləmir, çünki Rusiya buna dəvət olunmayıb.

İyunun 15-16-da İsveçrənin Bürgenstok şəhərində Rusiya və Ukrayna arasında münaqişənin sülh yolu ilə həllinə dair beynəlxalq konfrans keçiriləcək. Çin də daxil olmaqla 160 ölkə dəvət alıb. Rusiya sammitə dəvət edilməyib. 50-dən çox ölkə sammitdə iştirakını təsdiqləyib.

S.ELAY

XQ