Cəmi ay yarımdan sonra Rusiya–Ukrayna müharibəsinin başlanmasının ikinci ili tamam olacaq. Bu ağır silahlı qarşıdurma hər iki ölkənin iqtisadiyyatına ağır zərbələr vurub. Ən başlıcası, bir vaxtlar dost sayılan bu xalqlar müharibədə on minlərlə oğul və qızını itirib.
Hazırda döyüşlər isə bütün cəbhə boyu davam edir. Dünən Ukrayna Silahlı Qüvvələri Rusiyanı Krım yarımadası ilə birləşdirən dəmiryolunu dağıdıb. Bu barədə Mariupol şəhəri merinin müşaviri Pyotr Andryuşenko özünün “Teleqram” saytında yazıb.
O bildirib ki, Ukrayna Ordusu Qranitnoye kəndi ərazisinə dəqiq zərbələr endirib. Məlumata görə, ərazidəki yanacaq çənləri də hədəf alınıb. Qeyd edək ki, Ukrayna son günlər Krım yarımadasına müntəzəm zərbələr endirir.
Bununla bərabər, Ukraynanın silah-sursat sarıdan problemləri durmadan artır. Görünən budur ki, Qərbin maliyyə yardımının getdikcə azalması Ukraynanın daha ucuz dronlara üstünlük verməsinə səbəb olur.
Dünən “FPV” pilotsuz təyyarə layihəsinin koordinatoru Boqdan Danilov bildirib ki,Ukraynanın son zamanlar modern silahlara olan tələbatı çox artıb. Onun sözlərinə görə, Kiyev gələcəkdə adıçəkilən dronlar üçün bütün komponentləri ölkə daxilində istehsal etməyi planlaşdırır. Ukrayna Prezidenti Volodimir Zelenski isə bildirib ki, bu il ölkədə 1 milyon dron istehsal olunacaq.
Bu arada məlum olub ki, ABŞ Ukraynanı “Patriot” raketlərinin mərmiləri ilə uzun müddət təmin edə bilməyəcək. “The New York Times” qəzeti bu barədə ABŞ-dakı mənbələrə istinadən yazıb.
Qeyd olunub ki, səbəb maliyyədir. Belə ki, bu sistemlər üçün təkcə kəsici mexanizmlərin qiyməti 2–4 milyon dollardır. Ukrayna Silahlı Qüvvələrinin adı açıqlanmayan zabiti məsələyə münasibət bildirirəkən söyləyib ki, bu, Kiyevə baha başa gələ bilər: “Xarici tərəfdaşlarımız bizdən üz döndərsələr, müharibənin başlanğıcına qayıdacağıq. İnsanlarımız sığınacaqlardan çıxa bilməyəcəklər, qarşı tərəf şəhərlərimizi xarabalığa çevirməyə davam edəcək”.
Xatırladaq ki, Rusiya ilə Ukrayna arasında müharibə 2022-ci il fevralın 24-də başlayıb. Ukrayna ötən ilin iyunundan əks-hücum əməliyyatları həyata keçirir. Rəsmi Kiyevin mövqeyinə görə, Ukraynanın ərazi bütövlüyü tam təmin olunmadan müharibə başa çatmayacaq. Prezident Volodimir Zelenski daha əvvəl bildirmişdi ki, Qərb dəstəyini dayandırsa, ölkəsi geri çəkilməyə məcbur olacaq. Prezident əks-hücum əıməliyyatının uğursuz olduğunu da etiraf edib.
Yeri gəlmişkən, ABŞ Prezidentinin milli təhlükəsizlik üzrə köməkçisi Ceyk Sallivan bildirib ki, Konqres Ukrayna üçün əlavə büdcə ayırmalarını təsdiqləməkdən imtina edərsə, Ağ ev administrasiyası 2024-cü ilin yanvarından Ukraynaya yeni silah paketləri ötürmək imkanını itirəcək.
M.HACIXANLI
XQ