Çin hökuməti ABŞ-ın Tayvan administrasiyasına silah verməsi, eləcə də Çin müəssisələri və fiziki şəxsləri ilə bağlı məhdudiyyətlər tətbiq etməsi ilə əlaqədar bu ölkənin beş şirkətinə qarşı cavab sanksiyaları tətbiq edəcək. Bu barədə Çin Xarici İşlər Nazirliyi məlumat yayıb.
“Birləşmiş Ştatlar Çinin Tayvan bölgəsinə silah satmaqla və müxtəlif bəhanələrlə Çin müəssisə və şəxslərinə qarşı qeyri-qanuni birtərəfli sanksiyalar tətbiq etməklə “vahid Çin” prinsipini açıq şəkildə pozur”, – deyə XİN-in bəyanatında bildirilir.
ABŞ tərəfinin yol verdiyi ciddi pozuntulara cavab olaraq, Çin Xalq Respublikasının “Xarici sanksiyalara qarşı mübarizə haqqında” qanununa uyğun olaraq, “BAE Systems Land and Armament”, “Alliant Techsystems Operation”, “AeroVironment”, “ViaSat və Data Link Solutions” şirkətlərinə qarşı sanksiyalar tətbiq etmək qərara alınıb.
Çin XİN-in məlumatına görə, tətbiq edilən sanksiyalar bu şirkətlərin ölkə ərazisindəki daşınmaz əmlakı da daxil olmaqla onların aktivlərinin dondurulmasını nəzərdə tutur. “Təşkilatlar və şəxslərə onlarla əqdlər bağlamaq, əməkdaşlıq etmək və ya digər qarşılıqlı fəaliyyət növlərini həyata keçirmək qadağan edilir”, – deyə bəyanatda vurğulanır.
Sənəddə vurğulanır ki, Birləşmiş Ştatlar öz hərəkətləri ilə Çinin suverenliyini, dövlət təhlükəsizlik maraqlarını, müəssisə və şəxslərinin qanuni hüquqlarını pozur və “Tayvan boğazında sülh və sabitliyə ciddi ziyan vurur”.
Bəyanatda deyilir: “Çin bu cür tədbirlərdən qəti şəkildə narazıdır. Çin hökuməti öz ölkəsinin suverenliyini, təhlükəsizliyini və ərazi bütövlüyünü, Çin müəssisələrinin və vətəndaşlarının qanuni hüquq və mənafelərini qorumağa sadiqdir. Biz israr edirik ki, ABŞ tərəfi “vahid Çin” prinsipinə, Çin və ABŞ-ın üç birgə kommünikesinin müddəalarına riayət etsin, beynəlxalq hüquqa və beynəlxalq münasibətlərin əsas normalarına hörmət etsin, Tayvanı silahlandırmaqdan və birtərəfli qaydada qeyri-qanuni sanksiyalar tətbiq etməkdən çəkinsin”.
Cin XİN Vaşinqtonun Tayvanla hərbi-texniki əməkdaşlığından ciddi narahatlıq keçirdiyini bildirib.
Qeyd edək ki, Tayvan 1949-cu ildən özünün administrasiyası tərəfindən idarə olunur. Lakin əksər ölkələr, o cümlədən Rusiya adanı Çinin əyalətlərindən biri hesab edir. Birləşmiş Ştatlar 1979-cu ildə Tayvanla diplomatik əlaqələri kəsib və ÇXR ilə əlaqələr qurub. Hazırda isə “vahid Çin” siyasətinə sadiqliyini etiraf edən Birləşmiş Ştatlar Tayvan administrasiyası ilə əlaqələri davam etdirir, hətta adanı silahla təmin edir.
Paşa ƏMİRCANOV
XQ