Türkiyə mediasında yayılan məlumatda bildirilir ki, qardaş ölkənin Gümüşhane Universitetinin alimləri 1926-cı və 1930-cu illərdə Türkiyə Mineral Tədqiqatlar və Kəşfiyyat Baş İdarəsi tərəfindən Bayburtda aparılan neft kəşfiyyatı işlərini dərinləşdiriblər.
Bölgədə neft ehtiyatları olduğunu müəyyənləşdirən elm adamları bu ərazidə fəaliyyətin zəruriliyini vurğulayıblar. Ərzincandakı neft sızıntıları ilə bağlı rus neftinə bənzər əlamətin mövcudluğuna dair məruzələr də edilib.
Gümüşhane Universiteti geofizika mühəndisliyi fakültəsinin rəhbəri professor Nafiz Maden Aşağı Çimağıl kəndində gördükləri işlər nəticəsində suyun səthində neft sızıntılarının müşahidə edildiyini, hətta neft iyinin də hiss olunduğunu bildirib.
Xatırladaq ki, bir müddət əvvəl Türkiyə Prezidenti Rəcəb Tayyib Ərdoğan ölkənin cənub-şərqində 150 milyon barel xalis neft ehtiyatı olan, təxminən 21,3 milyon ton ehtiyata malik yatağın kəşf edildiyini açıqlamışdı.
“Xalq qəzeti”
.jpeg)
