Dünyanın ən böyük buğda idxalçıları Rusiya Federasiyasının istəyinə zidd olaraq Ukrayna taxılını alacaq. Onların arasında Misir də var. Bu ölkə Rusiyanın Ukrayna taxılının ixracına imkan yaratmaqdan geri çəkilməsini tənqid edib və müqavilənin dayandırılmasından sonra da Ukrayna buğdasını idxal etməyə davam edəcəyini bildirib.
Bu bəyanatla Misirin təchizat naziri Əli əl-Museyihi çıxış edib. O, Rusiyanı taxıl müqaviləsi ilə bağlı qərarına yenidən baxmağa çağırıb. Nazir həmçinin qeyd edib ki, dünyanın ən böyük buğda idxalçılarından biri olan Misir Ukrayna buğdasını Avropa vasitəsilə qəbul etmək niyyətindədir. Nazir deyib: “Rusiyanın BMT-nin taxıl ixracı ilə bağlı sazişindən çıxmasından narazıyıq. Misir iqtisadiyyatı taxılın qiymətinin qalxmasından zərər çəkir”.
Kiyev isə alıcılarına taxılı Qara dəniz vasitəsilə ixrac etmək üçün istənilən riskə getməyə hazırdır. Bunu Ukraynanın xarici işlər naziri Dmitri Kuleba “Time” nəşrinə müsahibəsində bildirib. O əlavə edib ki, Ukrayna təhlükə səviyyəsini azaltmaq üçün maraqlı tərəflərlə əlaqə qurmağı planlaşdırır. Kuleba hesab edir ki, Rusiya bu dəfə taxıl müqaviləsi ilə bağlı mövqeyini dəyişməyəcək: “Biz istənilən riskə hazırıq. Düşünürəm ki, dünyaya mesajımız budur– Rusiya bizə lazım deyil”.
Rusiya isə buna imkan vermək niyyətində deyil. Bu ölkənin hərbçiləri Odessa vilayətində taxıl və kənd təsərrüfatı avadanlıqlarının saxlanıldığı terminalı gecə saatlarında “Kalibr” raketləri ilə atəşə tutub. Bu barədə Cənub Müdafiə Qüvvələrinin spikeri Nataliya Qumenyuk bildirib: "Düşmən terroru davam etdirir, bu, şübhəsiz ki, "Taxıl sazişi" ilə bağlıdır. Bu gecə işğalçılar Odessa vilayətində kənd təsərrüfatı müəssisəsini vurublar". Məlumata görə, işğalçılar 100 ton noxudu və 20 ton arpanı məhv ediblər.
Bunların fonunda cəbhədə döyüşlər davam edir. Ukrayna ordusu Donetsk vilayətinin Baxmut şəhərinin cənub cinahı istiqamətində 1,8 kilometr irəliləyib. Amerika təhilçilərinin hesablamalarına əsasən, Ukrayna Silahlı Qüvvələri Orexovadan cənuba və cənub-şərqə gündə təxminən 100 metr irəliləyir.
Pünhan ƏFƏNDİYEV, “Xalq qəzeti”