Rusiyada çağırış yaşının həddi 18 yaşdan 30 yaşa qədər artırıla bilər. Bu barədə iyulun 21-də jurnalistlərə Dövlət Dumasının Müdafiə Komitəsinin rəhbəri Andrey Kartapolov məlumat verib.
Onun sözlərinə görə, qanun layihəsinin ikinci oxunuşuna müvafiq düzəliş Dövlət Dumasının Müdafiə Komitəsi tərəfindən dəstəklənib: “Əsas düzəliş ondan ibarətdir ki, çağırış yaşının yuxarı həddi 30 yaşdır və aşağı həddini isə 18 yaşda saxlamaq qərara alınıb. Çünki bir çox oğlanlar 18 yaşında xidmət etmək istəyirlər. İndi onlara belə bir şans verilir".
Qanun layihəsinin birinci oxunuşunda çağırış yaşının aşağı həddinin 18 yaşdan 21 yaşa qaldırılması nəzərdə tutulurdu. Kartapolovun sözlərinə görə, çağırış yaşının 30-a qaldırılması ilə bağlı yeni qaydalar bu ilin payız çağırışına şamil edilmir: “Qanunun 2024-cü il yanvarın 1-dən qüvvəyə minməsi təklif edilir”.
Xatırladaq ki, birinci oxunuşda çağırış yaşının mərhələli şəkildə 21 yaşa qaldırılması haqqında qanun layihəsi iyunun 14-də Dövlət Dumasında qəbul edilmişdi. Layihənin özü mayın 13-də Dövlət Dumasına təqdim edilib və iyunun 8-də Müdafiə Komitəsi onu təsdiqləyib. Bundan əvvəl, 21 dekabr 2021-ci ildə Rusiyanın müdafiə naziri Sergey Şoyqu çağırış yaşının artırılmasını təklif edib. Bundan başqa, o vurğulayıb ki, vətəndaşlara onların müraciəti əsasında xidmətə getdikləri ilk gündən müqavilə ilə hərbi xidmətə daxil olmaq imkanı yaradılmalıdır.
Pünhan ƏFƏNDİYEV, “Xalq qəzeti”