Ermənistanın baş naziri Nikol Paşinyan Rusiya prezidenti Vladimir Putinlə telefonla “Dağlıq Qarabağ ətrafındakı vəziyyəti” (Azərbaycanın Qarabağ bölgəsi – red.) müzakirə edib.
Bu barədə Kremlin mətbuat xidməti məlumat yayıb.
Söhbətin Ermənistan tərəfinin təşəbbüsü ilə baş tutduğu qeyd edilir.
“Dağlıq Qarabağ ətrafındakı vəziyyət, o cümlədən Laçın dəhlizi boyunca maneəsiz nəqliyyat əlaqələrinin təmin edilməsi məsələləri müzakirə edilib. 2020-2022-ci illərdə Rusiya, Ermənistan və Azərbaycan liderləri arasında bütün sazişlərin ardıcıl şəkildə həyata keçirilməsinin prinsipial əhəmiyyəti vurğulanıb”, - deyə məlumatda bildirilir.
Rusiya prezidenti Rusiya tərəfinin Ermənistan-Azərbaycan sülh müqaviləsinin işlənib hazırlanmasında əməli yardımı davam etdirməyə hazır olduğunu təsdiqləyib.
Paşinyan və Putin müxtəlif səviyyələrdə təmasları davam etdirmək barədə razılığa gəliblər.
"Xalq qəzeti"
