Cümə günü Yunanıstanın Afina şəhərində “Türkiyə mətbəxi həftəsi” çərçivəsində türk mətbəxi nümayiş olunub.
Türkiyənin Afinadakı səfirliyinin binasında keçirilən tədbirdə Türkiyənin Yunanıstandakı səfiri Çağatay Erciyes qonaqlara türk mətbəxinin unikallığı haqqında məlumat verib.
Türkiyənin Belqraddakı səfiri Hami Aksoyun xanımı Canan Parmaksızoğlu Aksoy çıxış edərək türk mətbəxinin əsrlər boyu böyük bir coğrafi məkanda yaşayan xalqlar üçün çoxlu ortaq nöqtələrinin olduğunu deyib.
Parmaksızoğlu həmçinin Türkiyənin Hatay vilayətinin UNESCO-nun qastronomiya üzrə Yaradıcı Şəhərlər Şəbəkəsinə daxil olduğunu da vurğulayıb.
Qeyd edək ki, hər il mayın 21-27-də Türkiyə Cümhuriyyətinin birinci xanımı Əminə Ərdoğanın rəhbərliyi, Mədəniyyət və Turizm Nazirliyinin dəstəyi ilə ölkə daxilində və xaricdə “Türk mətbəxi həftəsi” keçirilir.
Fidan HÜQUQQIZI, “Xalq qəzeti”
