Tehranda ingilis dilində nəşr olunan işgüzar qəzeti "Financial Tribune" yazır ki, Qərb ölkələri Moskva və Tehranın son illərdə fəal şəkildə istifadə etdiyi "Şimal-Cənub" Beynəlxalq Nəqliyyat Dəhlizinə (BND) qarşı sanksiyalar tətbiq etməyə hazırlaşır.
"Financial Tribune"nun məlumatına görə, ABŞ və Avropa İttifaqı Qərbdə sanksiyalardan yan keçmək üçün alət kimi qəbul edilən "Şimal-Cənub" BND-dən istifadənin qarşısını almaq niyyətindədir.
Bu məqsədlə Vaşinqton və Brüssel ikinci dərəcəli məhdudiyyətlərdən istifadə etməyə hazırdır. Bu isə o deməkdir ki, onlar iqtisadi sanksiyaların əvvəllər tətbiq edilmədiyi ölkələrə təsir edəcək.
Nəşr qeyd edir ki, Moskva ilə iqtisadi əlaqələri saxlamaqla "Qərbə meydan oxuyan" Hindistan Mərkəzi Asiya və Avropa ilə ticarət əlaqələrini daha da gücləndirmək üçün Şimal-Cənub dəhlizindən istifadə etmək niyyətindədir.
Bu arada, Hindistanın BND vasitəsilə Avropa ilə ticarətə olan ümidləri Qərbin anti-Rusiya sanksiyaları ilə sarsıldı və bu, "fillər ölkəsi" üçün BND-nin investisiya cəlbediciliyini azaldıb.
Eyni zamanda, "Financial Tribune" xatırladır ki, "Şimal-Cənub" layihəsində də texniki problemlər var.
Məqalədə xüsusilə qeyd olunur ki, “Nəqliyyat dəhlizindəki əsas boşluqlardan biri İranın çoxdan gözlənilən 164 kilometrlik Rəşt-Astara dəmir yoludur”: "Maliyyə problemləri işin tamamlanmasını gecikdirdi, baxmayaraq ki, Rusiya bütün lazımi vəsaiti təmin etməyə razılaşıb”.
Burada qeyd etmək lazımdır ki, “Şimal-Cənub” BND-nin dəmir yolu seqmentinin tam aktivləşdirilməsi üçün Rusiya və İran dəmir yollarının Azərbaycan ərazisindən birləşdirilməsi tələb olunur. Bununla bağlı xatırladaq ki, bir neçə gün əvvəl İran rəsmiləri Rusiya və İranın may ayında Rəşt-Astara dəmir yolu layihəsinin başa çatdırılması ilə bağlı yeni saziş imzalayacağını açıqlamışdı. Eyni zamanda, məlumatlara görə, Azərbaycanın da bu müqavilədə iştirak edəcəyi ehtimal edilir.
Hazırda Azərbaycan ərazisindən Rusiyadan İrana “Şimal-Cənub” BND üzrə avtomobil yüklərinin daşınmasının həcmi xeyli artıb. Eyni zamanda, Ukraynada müharibə başlayandan sonra Rusiya ilə İran arasında Xəzər dənizi ilə yükdaşımaların həcmi də artıb.
Beləliklə, Şimal-Cənub nəqliyyat dəhlizi Rusiya üçün Qərbin sanksiyalarının təsirini azaltmaq və ticarət yollarını şaxələndirmək üçün getdikcə strateji əhəmiyyətli alətə çevrilir.
Baş verən prosesləri diqqətlə izləyən Qərbin də boş dayanmaması və alternativ meqalayihənin bütün iştirakçılarına qarşı yeni sanksiyalar tətbiq etməyə hazırlaşması təbiidir. (haqqin.az)