Bu gün dünya tarixinin ən dağıdıcı müharibələrindən biri olan İkinci Dünya müharibəsində nasizm üzərində tarixi qələbənin qazanılmasından 78 il ötür. 9 May – Qələbə Günü kimi qeyd olunan bu əlamətdar gündə bəşəriyyəti ciddi təhdid altında qoyan nasizm təhlükəsinə qarşı mübarizə aparan hər kəsin, o cümlədən, müharibə dövründə misilsiz şücaət və fədakarlıq nümayiş etdirən qəhrəman həmvətənlərimizin əziz xatirəsini dərin hörmət və ehtiramla yad edirik.

Nasizm üzərində qələbənin ildönümündə irq­çilik, nasizm, faşizm kimi beynəlxalq sülh və təh­lükəsizliyə hədə törədən təhlükəli ideologiyalara bəraət qazandırılması, onları dəstəkləyənlərin qəhrəmanlaşdırılması cəhdlərini qətiyyətlə pislə­yir, bir daha bütün dünyanı sarsıdan, kütləvi in­san tələfatı və dağıntılarla nəticələnən müharibə təhlükələri ilə üzləşməmək naminə beynəlxalq ictimaiyyəti bu kimi tendensiyaların aradan qaldı­rılması istiqamətində əməkdaşlığa çağırırıq.

Bu fikirlər Azərbaycan Xarici İşlər Nazirliyinin nasizm üzərində Qələbənin 78-ci ildönümü ilə bağlı yaydığı bəyanatda öz əksini tapıb. 

Bəyanatda deyilir: “Tarix boyu Vətənini, suve­renliyini və ərazi bütövlüyünü qorumaq naminə bütün fədakarlıqlara hazır olan xalqımızın müasir tarixi də parlaq qələbələrlə, xüsusilə 44 günlük Vətən müharibəsində müzəffər Ali Baş Komanda­nın rəhbərlik etdiyi rəşadətli Azərbaycan Ordusu­nun qazandığı şanlı Zəfərlə əlamətdardır. Məhz 44 günlük Vətən müharibəsində xalqımız bey­nəlxalq səviyyədə tanınmış ərazi bütövlüyümüzün bərpası naminə səfərbər olaraq Ermənistanın 30 ilə yaxın davam edən qeyri-qanuni hərbi işğalına son qoydu, bununla da tariximizə şanlı Zəfəri yaz­mağa müvəffəq oldu.

Nasizm üzərində qələbənin qazanılmasında müharibə illərində ön cəbhədə, o cümlədən, arxa cəbhədə igidlik göstərən, 600 mindən çox oğul və qızını cəbhəyə yola salan, Qafqazdan Berlinədək şanlı döyüş yolu keçən Azərbaycan xalqının rolu və xidmətləri danılmazdır. Bu xüsusda, qələbə­nin qazanılmasında göstərdiyi şücaətə görə 123 həmvətənimiz Sovet İttifaqı Qəhrəmanı adına la­yiq görülüb, 170 mindən artıq əsgər və zabitimiz müxtəlif orden və medallarla təltif olunub. 

Qələbə naminə tam səfərbərliyi ön cəbhədə döyüşən orduya dəstəyin göstərilməsində, o cüm­lədən, müharibədə qələbə qazanılmasında arxa cəbhədə xalqımızın fədakar əməyi müstəsna əhə­miyyət kəsb edib. 

Azərbaycanın təbii sərvətləri, xüsusilə neft eh­tiyatları nasizmə qarşı aparılan mübarizədə qələ­bənin təmin olunmasında həlledici rol oynayıb. 1941-1945-ci illərdə Sovet İttifaqında istehsal olu­nan neftin 70 faizindən çoxu, benzinin 80 faizi və mühərrik yağlarının 90 faizi Azərbaycanın payına düşüb. Cəbhənin tələbatını ödəmək naminə ge­cə-gündüz çalışan neftçilərimizin əvəzsiz xidməti sayəsində istehsal olunan məhsullar müharibənin taleyində həlledici rol oynayıb.

Dövlətimizin müstəqilliyi, ərazi bütövlüyü və suverenliyi uğrunda canlarından keçən həm­vətənlərimizin əziz xatirəsi xalqımızın qəlbində əbədi yaşayacaq. Bir daha tariximizə şanlı qələ­bələr yazan qəhrəman soydaşlarımızı dərin hör­mət və minnətdarlıqla yad edirik”.

Q.QASIMOV, “Xalq qəzeti”