Mayın 5-də Bakıdakı Mehman və Müşfiq Nəbiyev qardaşları adına 51 nömrəli tam orta məktəbdə ümummilli lider Heydər Əliyevin anadan olmasının 100 ilik yubileyi münasibətilə tədbir keçirildi. Tədbirdən öncə Heydər Əliyevin xatirəsi bir dəqiqəlik sükutla yad edildi. Azərbaycanın dövlət himni səsləndirildi.

Əvvəlcə ulu öndərin həyat və fəaliyyəti, xalqımızın tərəqqisi uğrunda gördüyü işlər barədə məlumat verildi. Sonra məktəbin şagirdlərinin ifasında Heydər Əliyevə, Vətənə, Qarabağa və Azərbaycana həsr olunmuş şeirlər söylədilər, mahnı və rəqs ifa etdilər. 

Ümummilli liderin ömür gün yoldaş, bu günlərdə 100 illik yubileyi qeyd olunan  akademik Zərifə xanım Əliyevanın  da xatirəsi anıldı. Xalqımızın böyük oğlunun Vətən və dövlət quruculuğu yönündə fəaliyyətini diqqətə çatdıran videoroliklər, slaydlar nümayiş olundu. 

Məktəbdə eyni zamanda təşkil olunan şagirdlərin əl işlərindən ibarət sərgiyə də baxış keçirildi. Sərgidə şagirdlərin müxtəlif sənət sahələri üzrə bacarıqları nümayiş etdirilirdi.

Tədbirin sonunda məktəbin direktoru Tərlan Bayramova bildirdi ki, 100 illiyi dövlət səviyyəsində qeyd edilən Heydər Əliyevin əziz xatirəsi həmişə qədirbilən xalqımız tərəfindən yüksək tutulacaq. Çünki Heydər Əliyevin ideyaları, onun təməlini qoyduğu müstəqil Azərbaycan hələ bundan sonra neçə yüzilliklər boyu yaşayacaq və inkişaf edəcək. 

Qabil YUSİFOĞLU,

“Xalq qəzeti”