Ailə, Qadın və Uşaq Problemləri üzrə Dövlət Komitəsinin təşkilatçılığı ilə Şuşa şəhərində bu mövzuda keçirilən konfransda İslam aləmində gender problemləri diqqət mərkəzində olub.

Azərbaycan Respublikası Ailə, Qa­dın və Uşaq Problemləri üzrə Dövlət Komitəsinin sədri Bahar Muradova bildirib ki, konfransın məqsədi qadı­nın dəyəri, onun statusu və hüquqları barədə mövcud yanaşmalar haqqında ətraflı fikir mübadiləsi aparmaqla İslam mədəniyyətinin təbliğində qadınların rolunun gücləndirilməsinin vacibliyini bir daha vurğulamaq, onları İslam dün­yasının inkişafına yönələn bütün is­tiqamətlərdə fəal olmağa çağırmaqdır: “Bəşəriyyətin yaranması, inkişaf etmə­si, eləcə də yenilənməsində əvəzsiz rol oynayan qadınlar bu gün belə qlobal problemləri aradan qaldırmağın yolla­rını kişilərlə birgə axtarırlar. COP29-un Təşkilat Komitəsində qadınların da işti­rakı bunun əyani sübutudur”.

VI çağırış Milli Məclisin deputatı, Ailə, qadın və uşaq məsələləri komitə­sinin sədri Hicran Hüseynova vurğula­yıb ki, qadın və uşaq hüquqları ilə bağlı ciddi maarifləndirmə aparılmalıdır. O, bəzi İslam ölkələrində hələ də qadın­ların hüquqlarının pozulması hallarının baş verdiyini deyib. “İslam Əməkdaşlıq Təşkilatı, həmçinin müxtəlif ölkələrin müvafiq qurumları və İslam dünyasının problemlərini araşdıran təsisatlar bu is­tiqamətdə önəmli tədbirlər təşkil edir”.

Azərbaycan Respublikası Dini Qu­rumlarla İş üzrə Dövlət Komitəsinin sədri Ramin Məmmədov ölkəmizin İslam dünyasının bir parçası olduğunu, tarixdə qazandığı nailiyyətləri ilə bir çox ilklərə imza atdığını söyləyib. Türkiyə­nin Azərbaycandakı səfiri Cahit Bağçı ölkəsindəki qadınların hüquqlarından danışıb, onların bir çox sahələrdə rəh­bər vəzifələrdə çalışdıqlarını diqqətə çatdırıb. Mədəniyyət nazirinin müavini Səadət Yusifova Azərbaycan qadını­nın həm ailədəki, həm də cəmiyyətdə­ki sarsılmaz mövqeyinin dövlətimizin uğurlu sosial siyasətinin nəticəsi oldu­ğunu vurğulayıb. 

Konfrans işini Dini Qurumlarla İş üzrə Dövlət Komitəsinin sədr müavini Gündüz İsmayılovun moderatorluğu ilə keçirilən panel iclasla davam etdirib. Cəbrayıl, Qubadlı və Zəngilan rayonla­rında Azərbaycan Prezidentinin xüsusi nümayəndəliyinin böyük məsləhətçisi Nərgiz Qaracayeva, VI çağırış Milli Məclisin Deputatı Ceyhun Məmmədov, Azərbaycan Memarlıq və İnşaat Uni­versitetinin rektoru Gülçöhrə Məmmə­dova, Qafqaz Müsəlmanları İdarəsinin İctimaiyyətlə əlaqələr və ailə problem­ləri üzrə sədr müavini Qəmər Cavadlı, “Əhməd Ağaoğlu” İctimai Birliyinin sədri Nigar Axundova müzakirə edilən möv­zu ilə bağlı mülahizələrini açıqlayıblar. 

Konfransda geniş müzakirə aparı­lıb, suallar cavablandırılıb.

Zərifə HÜSEYNOVA
XQ

Şuşa