Reabilitasiya xidmətləri

Bərdə şəhərindəki Qarabağ Regional DOST Mərkəzinin “RehaPoint” məntəqə­si bölgə sakinlərinə ambulator reabilitasi­ya xidmətlərini davam etdirir.

Bu barədə XQ-yə məlumat verən Dövlət Tibbi-Sosial Ekspertiza və Rea­bilitasiya Agentliyinin şöbə müdiri Tural Qurbanov qeyd edib ki, ötən il dekabrın 1-dən fəaliyyətə başlayan məntəqədə indiyədək 750-dən çox əlilə reabilitasiya xidmətləri göstərilib. Burada ambula­tor formada müalicəvi bədən tərbiyəsi, əmək terapiyası, psixoloq və loqoped xidmətləri təşkil edilib. 

Müəssisə əlilləri ehtiyac duyduqları reabilitasiya vasitələri ilə də təmin edir. Ötən dövrdə “RehaPoint”də 300-dən çox şəxsə reabilitasiya vasitəsi verilib. 

18 əlil Türkiyədə təcrübə keçəcək 

Sosial Xidmətlər Agentliyi Əlilliyi olan Şəxslərin Peşə Əmək Reabilitasiyası Mərkəzi əlilliyi olan daha 18 gənci Tür­kiyəyə təcrübə kursuna göndərib.

Yolasalma mərasimində agentliyin İdarə heyətinin sədri Vüqar Behbudov mərkəzin bu il daha 30 nəfəri bu təcrü­bə proqramına cəlb edəcəyini bildirib. O deyib ki, gənclərimiz qardaş ölkənin An­kara və Antalya şəhərlərində əlilliyi olan şəxslərlə bağlı peşə kurslarında iştirak edərək, bacarıqlarını daha da təkmilləş­dirəcəklər. Belə təcrübə səfərləri Sosial Xidmətlər Agentliyi ilə “Sağlam düşüncə” Gənclər Təşkilatı arasında imzalanmış əməkdaşlıq müqaviləsinə əsasən, Avro­pa İttifaqının Avropa Həmrəylik Korpusu Proqramı çərçivəsində təşkil olunur. İn­diyədək 147 əlil Türkiyədə təcrübə kurs­larına göndərilib. Onlardan bir hissəsi Vətən müharibəsi qazisidir. 

570 benefisiar təlimlərdə iştirak edib 

DOST İnklüziv İnkişaf və Yaradıcılıq Mərkəzində həssas qruplara aid şəxslə­rin yaradıcı potensialının inkişafına, on­ların reabilitasiyası və cəmiyyətə inteqra­siyasına dəstək işləri aparılır. İndiyədək burada 570 benefisiar müxtəlif fəaliyyət istiqamətləri üzrə təlimlərə cəlb olunub.

2021-ci ilin oktyabr ayında açılışı olan mərkəzdə rəqs, təsviri incəsənət, dulusçuluq, musiqi, dərzilik, modelyerlik, xalçaçılıq, toxuma, tikmə, bədii oyma, floristika, bağçılıq və landşaft dizaynı, audio-səsyazma, fotoqrafiya, kulinariya, səhnə ifaçılığı, kapoeyra, badminton və s. üzrə təlimlər təşkil edilir. Təlimləri uğur­la başa vuranlara sertifikatlar təqdim edi­lib. Hazırda burada 180 nəfər benefisiar təlimlərdə iştirak edərək bacarıqlarını təkmilləşdirir. Onlardan 136 nəfəri əlillər, digərləri aztəminatlı ailələrdən olanlar, valideynlərini itirmiş və valideyn himayə­sindən məhrum olmuş şəxslər, şəhid ailələrinin üzvləri, müharibə ilə əlaqə­dar əlil olanlar və onların ailə üzvləridir. Mərkəzdə kompleks reabilitasiya, sosial - pedaqoji inkişaf və psixoloji dəstək işləri də aparılır. 

Zorakılıq qurbanlarına yardım

Sosial Xidmətlər Agentliyinin sosial sifarişləri əsasında Bakıda və Gəncədə məişət zorakılığından zərər çəkmiş şəxs­lər üçün yardım mərkəzləri fəaliyyətə başlayıb.

Mərkəzlər “Məişət zorakılığından zərər çəkmiş şəxslər üçün yardım mərkəzlərinin inkişafına dəstək” layihəsi çərçivəsində yaradılıb. Məqsəd məişət zorakılığından zərər çəkmiş şəxslərin və­ziyyətinin yaxşılaşdırılması, hüquqlarının qorunması, ahəngdar inkişafının təmin edilməsidir.

Zərifə BƏŞİRQIZI
XQ