Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəliyi, Azərbaycan Respublikası Elm və Təhsil Nazirliyi, Naxçıvan Dövlət Universiteti və Qərbi Azərbaycan İcmasının birgə təşkilatçılığı ilə “Qərbi Azərbaycana qayıdış” adlı festival-konqres keçirilib. Naxçıvanda növbəti dəfə keçirilən tədbir çərçivəsində Naxçıvan Dövlət Universiteti Elmi Kitabxanasında çap olunmuş dəyərli elmi əsərlərin təqdimatı baş tutub.

Tədbirdə fəxri üzv qismində iştirak edən Elm və Təhsil Nazirliyinin Botanika İnstitutunun baş direktoru, professor Səyyarə İbadullayevanın müəllifi olduğu “Xalq təbabətinin unudulmuş reseptləri (Qərbi Azərbaycan, Şərqi Zəngəzur və Qarabağ icmaları yaddaşlarından)” adlı kitabının təqdimatı keçirilib.

Təqdimat mərasimini Naxçıvan Dövlət Universitetinin rektoru Elbrus İsayev açaraq qeyd edib ki, Qərbi Azərbaycan mövzusu bu gün ölkə Prezidenti, Müzəffər Ali Baş Komandan tərəfindən ziyalılar qarşısında əsas vəzifə kimi qoyulub. Ali Baş Komandanımızın tapşırığı ilə Qarabağın işğaldan azad olunmasını, Qarabağa qayıdışı  bizim müzəffər ordumuz icra edibsə, Qərbi Azərbaycana qayıdışı da alimlər ordusu,  yəni bizlər qələmlə, sözlə, fikirlə, tarixlə, ədəbiyyatla təmin etməliyik. Yaxşı haldır ki, 30 il ərzində Qərbi Azərbaycan əsilli alimlərimizin bir hissəsi, hətta həmin torpaqlardan olmayanlar belə Qərbi Azərbaycan mövzusuna həmişə tədqiqatlarında yer ayırıblar. 

            Professor Səyyarə İbadullayeva çıxışında qeyd edib ki, “Xalq təbabətinin unudulmuş reseptləri (Qərbi Azərbaycan, Şərqi Zəngəzur və Qarabağ icmaları yaddaşlarından)” adlı kitabı “Qərbi Azərbaycana qayıdış” konsepsiyasına töhvə olaraq hazırlanıb və əsas məqsəd  “Böyük Qayıdış” icmalarına yaşadıqları bölgədə yayılan bitkiləri tanıtmaq, onların istifadə qaydalarını öyrətməkdir. Kitabda Qərbi Azərbaycan, Şərqi Zəngəzur və Qarabağ icmalarının yaddaşında qalan 200-dən çox bitki və bitki yığımlarının müalicəvi təsirləri, onların istifadə üsulları haqqında etnobotaniki sorğular nəticəsində toplanmış məlumatlar və bitkilərin şəkilləri əks olunub. Kitab 2023-cü ildən əhəmiyyətli mənbə kimi öz doğma el-obalarına qayıtmış icmalara təqdim olunur.  

Sonda müəllif kitabı haqqında səsləndirilən dəyərli fikirlərə görə öz təşəkkürünü bildirib və məzunu olduğu Naxçıvan Dövlət Universitetində təşkil olunan tədbiri qürurverici hadisə kimi qiymətləndirib. 

“Qərbi Azərbaycana qayıdış” festival-konqresi iştirakçılarin  Zəngəzur dəhlizinin əsas nöqtələrindən sayılan Ordubad rayonunun Kotam kəndi ərazisində və Salamməlik stansiyasında dəhliz boyu rəmzi addımlamasi ilə başa catib.

XQ