Mayisə Səbuhi dərdin şair etdiyi fədakar qadınlarıımızdandır. Oğlu Səbuhi Həsənquliyev Vətən müharibəsində qəhrəmanlıqla şəhid olandan sonra qəlbinin ağrı-acısını şeirlə söyləməyə başlayıb. Səbuhinin adını da özünə təxəllüs götürüb ki, ruhu daim şad olsun.
Müharibəyə qədər onun şeir yazdığını bilən az idi. Amma Şuşa ətrafında döyüşə yollanan oğlunun son sözləri – “Anama deyin ki, ağlamasın” – vəsiyyəti onu ağlamayıb, dərdini şeirlə ovutmağa vadar edib:
Nə zaman böyüyüb qəhrəman oldun?
Şuşanı qurtarıb arzuna doldun.
Vətənçün döyüşüb gül kimi soldun,
Məzarın zirvədə qazılıb sənin...
Bu şeir parçasında oxşanıb qutsallaşan igid Səbuhi 2002-ci ilin bir yaz günündə Ucarın Boyat kəndində doğulub. Sonra ailə Sumqayıta köçüb. Orta məktəb illərində bir sıra idman növləri ilə məşğul olan Səbuhi Həsənquliyev 2020-ci ilin iyulunda hərbi xidmətə yollanıb. İri cüssəsinə və ayıq-sayıqlığına görə onu XTQ-yə cəlb ediblər. Müharibə başlananda bir neçə ayın əsgəri olsa da, özünü cəsur, hünərvər hərbçi kimi göstərə bilib. İlk döyüşdən sonra axşam anası ilə telefonda danışarkən “Ana, oğlun düşmən öldürüb”, – deyə qürurlanıb da.
“Yaşma”larla birgə daim öndə gedən Səbuhinin döyüş yolu Beyləqan, Füzuli, Cəbrayıl, Hadrut və Şuşadan keçib. Noyabrın 8-də tac şəhərimiz Şuşa uğrunda son döyüş ərəfəsində sanki şəhid olacağını əvvəlcədən hiss edib və toya gedirmiş kimi, qoluna qırmızı lent bağlayıb. Döyüşə şir kimi girib, çox sayda düşməni məhv edib. Dostunun yaralandığını görüb və onu mərmi yağışının altından çıxarmağa çalışarkən özü də gülləyə tuş gəlib…
Siz deyin, bütün bunlardan xəbər tutan həssas, kövrək qəlbli ana necə odlanıb şeir yazmayaydı? Şəhadətindən sonra “Cəbrayılın azad olunmasına görə”, “Vətən uğrunda”, “Füzulinin azad olunmasına görə”, “Şuşanın azad olunmasına görə” və digər medallara layiq görülən Səbuhinin ən böyük mükafatı anasının ona həsr etdiyi Vətən sevgili misralardır. Mayisə xanım hər gün oğlunun ziyarətinə getdiyi Sumqayıt Şəhidlər xiyabanından qayıdanda duyğulanaraq, qəlb çırpıntılarını ağ vərəqlərə hopdurub. Nəticədə “Şəhidlik Tanrı hədiyyəsidir” kitabı ərsəyə gəlib.
Təkcə Səbuhinin deyil, torpağı Vətən edən digər şəhidlərimizin haqqında da qürur dolu neçə-neçə şeirin yer aldığı həmin kitab “Azəri” Poliqrafiya müəssisəsinin direktoru Mirfazil Əliyevin təşəbbüsü ilə təmənnasız olaraq nəşr edilib. Ötən yaz Sumqayıtdakı Əli Kərim adına Poeziya evində toplunun təqdimatı keçirilib. Mərasimdə şəhid general Polad Həşimovun anası Səmayə xanım, “Şəhid analarına dəstək” İctimai Birliyinin sədri, şəhid Əbdülməcid Axundovun anası Ceyran Həsənova, şəhid Əlizamin Mustafalının anası Ülviyyə xanım və digərləri çıxış edərək kitabın gənc nəslin formalaşmasında rolundan, oxuculara vətənpərvərlik duyğuları aşılamasından danışıblar.
Bu yaxınlarda isə Sumqayıt Tarixi Muzeyində Vətən müharibəsi şəhidi Səbuhi Əlixan oğlu Həsənquliyevin xatirəsinə həsr olunmuş anım mərasimində anasının ona həsr etdiyi şeirləri söyləməsi hər kəsi təsirləndirdi. Ölümü ilə tarix yazan igidin anası kitabının üzqabığına Səbuhinin şəklini qoydurub, səhifələrində isə ən duyğulu şeirləri yerləşdirib. Şair dostumuz Xaqani Abbasəli Öztürk “Ön söz əvəzi” adlı təqdimatında yazıb: “Bu ithafnamələrin çoxunu göz yaşları içində oxudum. Özəlliklə vurğulamaq istəyirəm ki, müəllif Mayisə xanımın içindəki Vətən sevgisinə heyran olmamaq mümkün deyil. Unudulmamalıdır ki, şəhid valideynlərinin könlü həsrət sığınacağı və hətta “iş yeri”dir”.
Kitabdakı “El aslanları” şeirində Mayisə xanım şəhidlərə xitabla yazır:
Dişə-diş, qana-qan, cana-can aldız,
Düşmənin canına vəlvələ saldız.
Tutub əl-qolunu kökdən qopardız,
Siz məlhəm oldunuz çəkilən dağa.
Bəli, saf ürəkli, məğrur şəhid anası Mayisə xanım oğlu Səbuhi kimi qəhrəmanlarımızı şöhrət zirvəsində belə görür. Ağlayıb-sıtqamaq onluq deyil. Çünki şeirlərinin baş qəhrəmanı Vətəndir.