Füzuli rayonunda həyat yenidən canlanır. Yaşayış məntəqələri abadlaşdırılır, bu torpaqların əzəli sahibləri sülh şəraitində əbədi yaşamaq üçün doğma yurdlarına qayıdırlar. Onların mənzil-məişət şəraitinin yaxşılaşdırılması istiqamətində genişmiqyaslı tədbirlər həyata keçirilir. İndiyədək Füzuli şəhərində 527 ailə olmaqla, 1969 nəfərin daimi məskunlaşması təmin edilib.
Hazırda sakinlərin yaşadıqları mənzillərdə hər cür şərait yaradılıb. Binaların daxili quruluşu, mənzillərin daxili dizaynı, mərtəbəlilik prinsipi, həmçinin binaların bir-birindən aralı olması kimi amillər diqqətdə saxlanılıb. Yəni rahat yaşamaq üçün bütün infrastruktur, şərait var.
Təhsil, səhiyyə, istirahət və digər məsələlərlə bağlı problemlər də həll edilir. Bundan başqa, ərazinin ekoloji tarazlığının bərpasına xüsusi önəm verilir. Məhz bu işlər çərçivəsində Füzuli şəhərində 22,4 hektar sahədə Mərkəzi Parkın salınması ərazidə ekoloji tarazlığın bərpasına ciddi töhfə verməklə yanaşı, Füzuli sakinlərinin, şəhərin qonaqlarının istirahəti üçün ən gözəl məkanlardan birinə çevriləcək. Ekoloji turizmin stimullaşdırılması ilə yanaşı, bioloji müxtəlifliyin qorunub saxlanılmasında mühüm rol oynayacaq.
Hazırda Qarabağ Dirçəliş Fondunun sifarişi əsasında Füzuli şəhərində salınacaq Mərkəzi Parkın ərazisinin tikili qalıqlarından və digər tullantılardan təmizlənməsi və ərazinin müvəqqəti hasara alınması işləri davam etdirilir. Görülən işlər zamanı ərazidə mövcud olan ağacların qorunmasına da xüsusi diqqət yetirilir. Belə ki, “Yaşıllıqların mühafizəsi haqqında” qanunun tələblərinə uyğun olaraq Ekologiya və Təbii Sərvətlər Nazirliyi tərəfindən parkın salınacağı ərazidə monitorinq keçirilib. Monitorinqin nəticəsi ilə bağlı verilən müvafiq rəyə uyğun olaraq Qarabağ Dirçəliş Fondunun təşəbbüsü ilə qurumun əməkdaşlarının, parkın tikintisi üçün layihə-smeta sənədlərini hazırlayan “By Medgalchi” şirkətinin cəlb etdiyi ekspertlərin və təmizlik işlərinin icraçısı olan “RAMCO” QSC şirkətinin müvafiq nümayəndələrinin iştirakı ilə ərazidə aparılan növbəti monitorinqlər zamanı saxlanılması tələb olunan 80-dən çox ağac müəyyənləşdirilib və onların qorunması üçün müvafiq işlər görülüb. Ərazidə olan dağdağan, göyrüş, zoğal, fındıq, sofora, ağcaqayın, qoz, o cümlədən Azərbaycan Respublikasının “Qırmızı Kitab”ına düşmüş Şərq çinarı, əncir və nar ağacları xüsusi nəzarətə götürülərək işarələndikdən sonra ətrafı hasara alınıb və onlara zəruri aqrotexniki qulluğun göstərilməsi qərara alınıb. Eyni zamanda, parkda ərazinin relyefinə və ekoloji mühitinə uyğun olaraq eldar şamı, şərq çinarı, leylandi, italyan şamı, ağcaqayın, söyüd, zeytun və s. kimi ağac növlərinin, həmçinin müxtəlif dekorativ kolların və çiçəklərin əkilməsi nəzərdə tutulur.
Park şəhər sakinlərinin asudə vaxtlarının səmərəli keçirilməsinə imkan yaradan məkana çevrilməklə yanaşı, sağlam və təbii ekoloji mühitin yaranmasına və qorunub saxlanmasına da şərait yaradacaq. Bu barədə Qarabağ Dirçəliş Fondunun İdarə Heyətinin sədri Rəhman Hacıyev bildirib ki, Füzuli Mərkəzi Parkının konsept-layihəsi Prezident İlham Əliyevin və Birinci vitse-prezident Mehriban xanım Əliyevanın tapşırıq və tövsiyələri nəzərə alınmaqla hazırlanıb. Parkın salınması ərazidə ekoloji tarazlığın bərpasına ciddi töhfə verməklə yanaşı, həm Füzuli sakinlərinin, həm də şəhərin qonaqlarının istirahəti üçün ən gözəl məkanlardan birinə çevriləcək.
Parkın salınması zamanı nəzərə alınacaq müasirliyin və milli-mədəni irsin vəhdəti Füzuli şəhərinin daha da gözəlləşməsinə xidmət etməklə yanaşı, bölgənin ekoloji tarazlığının bərpasına da böyük töhfə verəcək. Burada istirahət zonaları, multifunksional açıq yaşıllıq sahələri, iaşə zonaları, piknik və idman məqsədilə istifadə ediləcək zonalar, qaçış üçün cığırlar, velosiped yolları, amfiteatr, kafe-restoranlar və digər obyektlərin yaradılması nəzərdə tutulub. Fiziki imkanları məhdud olan insanlar, uşaqlar və yaşlı insanlar üçün rahat şəraitin yaradılması nəzərdə tutulub. Qeyd olunan məsələ ilə bağlı beynəlxalq qabaqcıl təcrübədən istifadə olunub.
Parkın ərazisindəki giriş və çıxışlarda məlumat lövhələrinin quraşdırılması, pandusların düzgün nəzərə alınması, sanitar qovşaqlarının əlçatan olması, uşaqlar üçün qum meydançalarının yaradılması, Füzuli rayonunun və Qarabağın tarixini əks etdirən məlumat lövhələri və qapalı əyləncə məkanlarının tikintisi də nəzərdə tutulur.
Qeyd edək ki, Böyük Qayıdış Proqramımızın birinci mərhələsinin sonunda – 2026-cı ildə 22 min insan Füzuli rayonunda yaşayacaq. 2040-ci ilədək Füzuli şəhərində 50 min vətəndaşımızın məskunlaşacağı gözlənilir. Əhali sayı 1993-cü il ilə müqayisədə 2.5 dəfə artacaq. Mərkəzi parkın yaradılması şəhər sakinlərinin asudə vaxtlarının səmərəli keçirilməsinə imkan yaradan məkana çevrilməklə yanaşı, sağlam və təbii ekoloji mühitin yaranmasına və qorunub saxlanmasına da şərait yaradacaqdır.
Pünhan ƏFƏNDİYEV
XQ
Füzuli
