Bir zaman burada “Araz” qəzetinin redaksiyası yerləşirdi
Üç il əvvəl Azərbaycan Milli Ordusu Füzulini erməni hərbi birləşmələrinin işğalından azad edəndən sonra şəhərdə vəziyyət belə idi.
Əbəs yerə deyil ki, Prezident, Ali Baş Komandan İlham Əliyev xarabazara çevrilmiş şəhərdəki həmin mənzərə barədə demişdi: “Füzulidə bayraq sancmaq üçün bir bina qalmamışdı”. Şəhərdə salamat bina olmadığından üçrəngli Azərbaycan bayrağı rayon qəzetinin redaksiyasının yerləşdiyi binanın uçulub dağılmış giriş qapısından asılmışdı.
O bina ki...Bir dəfə tanınmış şair Vaqif Bəhmənli “Doğulduğunuz Füzuli rayonu işğaldan azad edilsə, birinci olaraq hansı ünvana üz tutardınız?” sualına belə cavab verdi: “Orada mənə çox doğma olan “Araz” qəzetinin redaksiyası var. İlk növbədə, həmin redaksiyaya baş çəkərəm, çünki mən poeziyada ilk addımlarımı orada atmışam, şeirlərim ilk dəfə orada işıq üzü görüb...”
Bu binanın qapılarından kimlər keçməyib? Seyran Səxavət, Bəhram Nəsibov, Lətif Vəlizadə, Nemət Veysəlli, Mətləb Misir, Oruc Səda, Vahid Əlifoğlu, Əbülfət Mədətoğlu, Umud Rəhimoğlu...
Mən ilk dəfə bu binanın pilləkənlərinə ayaq basanda ürəyim uçunub. Orta məktəb illərində mil-mil şagird dəftərlərinə yazdığım şeir və məqalələri qəzet səhifələrində görmək arzusu ilə bu ünvana üz tutmuş, onun qapısına ayaq basmışam. İlk dəfə imza sevincini məhz bu ünvanda işıq üzü görən qəzet vasitəsilə yaşamışam... Sonralar adıma ilk əmək kitabçası bu ünvanda açılıb, ən doğma və unudulmaz xatirələrim bu məkanla bağlıdır...
İndi bu ünvan, xarabazarlığı xatırladan bu şəhərin qalıqları, dağılmış divarlar yaddaşımda gənclik illərimin ən əziz xatirələrini yaşadır...
Artıq Füzuli şəhəri ilk sakinlərini qoynuna alıb, şəhər saatbasaat, günbəgün dirçəlir, yeni evlər, yeni yaşayış məntəqələri salınır, infrastuktur qurulur, kəndlər tikilir, şəhər yeni növrağına qovuşur.
Üzərinə bayraq sancılan bina 30 illik həsrəti özündə yaşadan xatirə ünvanı kimi bu şəhərin sakinlərinə keçmişin bir parçası təsiri bağışlayır...
Süleyman QARADAĞLI