Türkiyədə yaşayan görkəmli azərbaycanlı alim və siyasi xadim, Türkiyə Prezident Administrasiyasının təhlükəsizlik və xarici siyasət komissiyasının üzvü professor Aygün Attara 2024-cü ilin ilk günlərində Türkiyə və Avropadan ikiqat mükafat xəbəri gəldi.
“İstanbul Elit WORLD Taksim” otelində “6-cı Qadın Sahibkarlara Dəstək Zirvəsi” bu dəfə “Güclü Qadınlar, Güclü Sabahlar” mövzusu ilə 9 yanvar 2024-cü ildə keçiriləcək mərasimdə mükafatlar Türk dünyasının içtimai-siyasi həyatında uğur qazanan qadınlara təqdim olunacaq. “Türk Dünyası Ödülü” kateqoriyasında görkəmli azərbaycanlı alim professor Aygün Attarın da adı yer alır.
Münsiflər heyətinin qərarında bildirilir ki, “Bir millət, iki dövlət siyasəti çərçivəsində önə çıxan baxışın ən mühüm tərəfdarlarından birinə çevrildiniz. Siz bu məsələ ilə bağlı konkret addımların atılmasına öncülük etdiniz. Siz Azərbaycanın inkişaf layihələrinin təbliğinə xüsusi töhfə vermisiniz. Bütün bu işlərinizə görə münsiflər heyəti yekdilliklə Sizə “Türk Dünyası Ödülü”nün verilməsini məqsədəuyğun saydı”.
Avropa Beynəlxalq Diplomatlar Birliyi tərəfindən verilmiş digər nüfuzlu mükafat da Türkiyə tərəfindən namizəd göstərilən professor Aygün Attara verilib. Avropanın mötəbər qurumlarından olan və 24 il əvvəl Avropa Şurasının məsul vitse-prezidenti Günter Verheugenin dəstəyi ilə avropalı diplomatlar tərəfindən yaradılan DWM Diplomatlar Assosiasiyası Avropa Şurası və Birləşmiş Millətlər ECOSOC tərəfindən akkreditə edilib, qərərgahı Almaniyada yerləşir.
Münsiflər heyətinin yekdilliklə qəbul etdiyi qərarda aşağıdakı ifadələr yer alır: “30 ilə yaxın erməni işğalı altında qalan Qarabağda və Şərqi Zəngəzurda doğulmuş, məcburi köçə məruz qalmış bir ailənin övladı olan professor Aygün Attar “Beynəlxalq Sülh və Akademiya” mükafatına layiq görülüb. Nəşr olunmuş çoxsaylı və dəyərli akademik araşdırmaları, iştirakçısı olduğuğu populyar televiziya proqramları, ölkə daxilində və xaricdə təqdim etdiyi konfranslar vasitəsilə Türkiyə və Azərbaycanın Avropa coğrafiyasında tarixi, siyasi və mədəni baxımdan layiqincə tanıdılması istiqamətindəki fəaliyyət və səyləri, rəhbərlik etdiyi təşkilat vasitəsi ilə vətəndaş cəmiyyətinə göstərdiyi müstəsna xidmətlərinə görə, ictimai təşkilatlar vasitəsilə dünyada sülhün dəstəklənməsi və tolerantlığın təşviqi istiqamətində ciddi işlərə öncülük etmiş, Türkiyə ilə Azərbaycan arasında əlaqələrin inkişafında körpü rolunu oynamış professor Aygün Attar beynəlxalq miqyasda - xaricdə, xüsusən də Avropada yaşayan soydaşları və nüfuzlu qeyri-hökumət təşkilatları ilə uğurlu mədəniyyət şəbəkəsi yaratdığına görə mükafat komissiyasının birgə qərarı ilə təltif edilir.
EBCA Avropa Biznes Klubu Assosiasiyası, DC Diplomatik Şurası, Ərəb-Türk İş Şurası, Enviro Kare, Lucas Nülle kimi beynəlxalq mötəbər qurum və təşkilatlarla əməkdaşlıq edən Avropa Beynəlxalq Diplomatlar Birliyinin mükafatlandırma mərasimi bu ilin mart ayında Almaniyanın Frankfurt şəhərində keçirilən beynəlxalq mərasimdə baş tutacaq.
Sözardı: Avropa Beynəlxalq Diplomatlar Birliyi “Beynəlxalq Diplomatiya Nailiyyət Mükafatları – 2024” Mükafat Komitəsinin açıqlamasından sonra Avropada yaşayan soydaşlarımızın sevincinə, ictimaiyyətin həyəcanına səbəb olan belə nüfuzlu mükafata görə professor Aygün Attarı Türkiyə və Azərbaycan başda olmaqla Türk Dünyası adından təbrik edirik. Azərbaycan Respublikasının Prezidenti cənab İlham Əliyev tərəfindən 2016-cı ildə “Vətənə xidmət” ordeni, 2022-ci ildə Azərbaycan və Türkiyə arasında əlaqələrin inkişafında göstərdiyi səylərə görə “Dostluq” ordeni ilə təltif edilən Aygün xanım, Türkiyə prezidenti cənab Rəcəb Tayyib Ərdoğanın Azərbaycana səfərləri zamanı rəsmi nümayəndə heyətinə daxil etdiyi, çox hörmət etdiyi bir alimdir. Təbrizli iş adamı ilə ailə həyatı quran və Təbriz gəlini olduğunu hər fürsətdə vurğulayan Aygün Attar üç uşaq anasıdır və bir nəvəsi var. Türk Dünyası birliyinə dəyərli töhfələri ilə seçilən qürurlu bir türk qadınıdır.
Zəngəzurda, Azərbaycanın Qubadlı rayonunda anadan olan Aygün Attar 1986-cı ildə Bakı Dövlət Universitetini bitirib, 1993-cü ildə Rusiya Elmlər Akademiyasında doktorluq dissertasiya işini uğurla müdafiə edib.
Ömrünün 30 ilindən çoxunu Türkiyədə yaşayan soydaşımız 2012-2016-cı illərdə Türkiyənin Girəsun Universitetinin rektoru olub. Azərbaycan tarixi və mədəniyyətinin təbliği istiqamətində fəaliyyət göstərən professor ermənilərin Azərbaycan və Anadolu türklərinə qarşı törətdiyi soyqırımlara həsr olunmuş çox saylı kitabların və silsilə məqalələrnin müəllifidir. Profesör Attarın iki elmi kitabı Azərbaycan Resbublikası Elm və Təhsil Nazirliyinin Elmi Metodoloji Şurasının gərarı ilə ali məktəblərdə dərs vəsaiti kimi tədris olunmaqdadır.
Professor Aygün Attar nüfuzlu ictimai-siyasi xadimdir. İstər Türkiyəyə, istərsə də Azərbaycana qarşı qərəzli fəaliyyət göstərən erməni lobbisi və onun uzantılarıyla illərdir yorulmadan mübarizə aparır və bu fəaliyyət onun həyat devizinə çevrilb. O, Türkiyə Böyük Millət Məclisində türk düşmənliyi fəaliyəti ilə tanınan erməni əsilli millət vəkili Karo Paylanın deputat mandatının huquq çərçivəsində ləğvinə, Qarabağ məsələsində Ermənistanın ədalətsiz mövgeyini müdafiə edərək Azərbaycanı ittiham eden HDP sədri Səlahaddin Dəmirtaşın vətənə xəyanətdə suclanmasına və haqqında cinayət işinin başladılmasına nail olmuştur.
ATƏT-in beynəlxalq müşahidəçisi statusunu daşıyan Aygün Attar son parlament seçkilərində ATƏT-in Azərbaycana qarşı yönəlmiş qərəzli və haqsız mövqeyini yazılı olaraq tənqid etməkdən çəkinməmiş, haqlı etirazı ilə bu nüfuzlu beynəlxalq təşkilata ciddi tarixi “dərs vermişdir”.
Professor Aygün Attar davamlı elmi yaradıcılıqla bərabər, diaspor işləri ilə də fəal şəkildə məşğul olur. 2021-ci ildən Türkiyə Prezident Administrasiyasının təhlükəsizlik və xarici siyasət komissiyasının üzvüdür. 2019-cu ildən Türkiyə-Azərbaycan Dostluq, Əməkdaşlıq və Həmrəylik Fondunun sədridir. Bilkənd Universitetinin qurucusu, professor İhsan Doğramacı tərəfindən 1997-ci ildə təsis edilən Fondun Azərbaycan-Türkiyə əlaqələrinin inkşafında xüsusi yeri var. Ümummilli lider Heydər Əliyevin professor İhsan Doğramacı ilə səmimi dostluq münasibətləri Fondun qısa müddətdə tanınmasına, inkişafına və nüfuz qazanmasına böyük təsir göstərib. Bu ənənə bu gün də uğurla davam etdirilməkdədir və hazırda professor Aygün Attarın rəhbərlik etdiyi Fond Ümummilli lider Heydər Əliyevin “Bir millət, iki dövlət” kəlamından qaynaqlanan tarixi missiyanın həyata keçirilməsində çox əhəmiyyətli işlər görməkdədir.
XQ
