(Fotoreportaj
Hər Yeni il bayramı qəlbimizə sevgi və məhəbbət bəxş edir. Bu bayramı sehrli edən çox şeylər var. Amma ilk növbədə bizi dostların, doğmaların diqqət, qayğı və sevgisi sevindirir.
Hər il olduğu kimi, bu il də doğma Bakı Yeni ili xoş əhval-ruhiyyə ilə qarşılamağa hazırlaşır. Şəhərin gəzməli-görməli tarixi məkanlarından olan İçərişəhərdə bu günlərdə təşkil olunan Yeni il yarmarkalarına baş çəkəndə, burada xüsusi bir bayram əhvali-ruhiyyəsinin yaşandığını hiss etdik.
Yarmarkada, əsasən, ev dekorları, təbii toxuma oyuncaqlar, kitablar və taxtadan əl işləri nümayiş olunur. Burada eyni zamanda təbii daşlarla işlənib hazırlanmış yaylıqları, qızıl suyuna salınmış gümüş əşyaları, bürclərə aid daşlardan hazırlanmış əl işlərini və s. görmək mümkündür.
Yarmarkada İsmayıllı rayonunun Lahıc qəsəbəsindən gətirilmiş, şəfa mənbəyi olan təbii, müalicəvi otlar, növbənöv ədviyyatlar, çaylar da ziyarətçilərin diqqətini özünə cəlb edir.
Bizə dedilər ki, burada tez-tez interaktiv oyunlar təşkil olunur, milli musiqilər səsləndirilir. Uşaq rəqs kollektivlərinin bir-birindən maraqlı çıxışları hamını valeh edir.
Fidan SALMAN,
Elşən AĞALAR,
XQ