Tovuzda Aqrar İnnovasiya Festivalı keçirilib

Tovuzda Kənd Təsərrüfatı Nazirliyinin Aqrar İnnovasiya Mərkəzinin təşkilatçılığı ilə keçirilən ənənəvi toxum sərgi-satış yarmarkasında Qazax, Ağstafa, Şəmkir, Gədəbəy, Göygöl, Samux rayonlarının DAİM rəhbərləri və 1500 fermer, toxumçular, ictimaiyyətin nümayəndələri və rayon sakinləri iştirak ediblər.

Tədbiri giriş sözü ilə açan Tovuz Ra­yon İcra Hakimiyyətinin başçısı Məmməd Məmmədov çıxış edərək deyib ki, kənd təsərrüfatının bütün sahələrində olduğu kimi, toxumçuluğun inkişafına da diqqət yetirilir. Bu gün rayonda keçirilən toxum sərgi-satış yarmarkası rayon və ətraf bölgələrdən olan fermerlərə keyfiyyətli toxum almaq üçün böyük imkanlar ya­radır. Çünki məhsuldarlığı artırmaq üçün fermerlər keyfiyyətli toxuma üstünlük ver­məlidirlər. Rayon rəhbəri “gərək toxumu elə seçəsən ki, sonradan peşimançılıq çəkməyəsən” deyərək fermerləri diqqətli olmağa çağırıb.

Aqrar İnnovasiya Mərkəzinin direk­toru Anar Cəfərov qeyd edib ki, bu gün toxum istehsalında müasir innovasiyalar­dan istifadə olunur, müxtəlif iqlim şərai­tinə uyğun toxumlar yetişdirilir. Ən əsası fermerlərin sərbəst seçim etmək imkanı var və regionlarda keçirilən yarmarkalar belə imkanlardan biridir.

Festivalda aqrar sahədə fəaliyyət göstərən şirkətlərin, həmçinin nazirliyin və digər dövlət qurumlarının mütəxəs­sisləri tərəfindən fermerlər üçün aqrar sığorta, bitkiçilik və heyvandarlıq, dəqiq əkinçilik, “ağıllı” kənd təsərrüfatı sistemlə­ri, ən yaxşı qabaqcıl kənd təsərrüfatı təc­rübələri, kənd təsərrüfatının inkişaf etdi­rilməsinə hədəflənən prioritet istiqamətlər barədə məlumatlar verilib.

Sonra aqrar sahədə innovativ məh­sul, avadanlıq və texnologiyalar nümayiş etdirilib, toxum sərgi-satışı, kənd təsər­rüfatı təyinatlı texnikalar, müasir suvarma metod və texnologiyaları, gübrə, pestisid nümunələri və aqrar sahəyə məxsus di­gər məhsullar sərgilənib. 

Fermerləri maraqlandıran suallar ca­vablandırılıb, müvafiq məsləhət və töv­siyələr verilib.

Hamlet QASIMOV,
XQ-nin bölgə müxbiri 

Tovuz