“YAŞAT” Fondu daha bir Vətən müharibəsi qazisinə dəstək olub.
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin İctimaiyyətlə əlaqələr şöbəsindən verilən məlumata görə, Fond yenidən tələbə adını qazanan qaziyə təhsil həyatında da dəstəyini əsirgəməyəcək.
Kamran Baxşizadə 1994-cü il oktyabrın 14-də dünyaya göz açıb. O, Vətən müharibəsi zamanı oktyabrın 14-də yaralanır və hər iki gözünü itirir. Lakin bu faciə ona həyatına qaldığı yerdən davam etməsi üçün əngəl olmur. Anası Kamran üçün kitablar oxuyur, onu ikinci təhsilə hazırlayır. Beləcə Kamran Bakı Dövlət Universitetinə qəbul olaraq yenidən tələbə adını qazanır.
Kamran möhkəm iradəsi, bitməyən həyat eşqi və əzmkarlığı ilə hər kəsə örnək olmağı bacarır. “YAŞAT” Fondu ilk gündən qazimizin yanındadır və təhsil həyatında da ona dəstək olmağa davam edəcək.
