Tədbir iştirakçıları əvvəlcə Zəfər Günü münasibətilə hazırlanmış sərgiyə baxmışlar. Daha sonra bölmənin böyük konfrans zalında keçirilən tədbir Azərbaycan Respublikasının Dövlət Himninin səsləndirilməsi və torpaqlarımızın bütövlüyü uğrunda canlarından keçən Şəhidlərin xatirəsinin anılması ilə başlamışdır.
AMEA Gəncə Bölməsinin sədri, akademik Fuad Əliyev tədbiri giriş sözü ilə açaraq, iştirakçıları və qonaqları salamlamış, millətimiz üçün çox qürurlu və əziz bir tarixi an olan Zəfər Gününə həsr olunmuş konfransı vacib elmi toplantı kimi xarakterizə etmişdir. O, Zəfər Gününü müzəffər Ali Baş Komandan İlham Əliyevin qüdrətli dövlət və ordu quruculuğu strategiyasının təntənəsi kimi dəyərləndirərək vurğulamışdır ki, məhz cənab Prezidentimizin rəhbərliyi altında, millətimizin həmrəyliyi və Azərbaycan Əsgərinin misilsiz igidliyi sayəsində Vətən torpaqlarımızın bütövlüyü tam bərqərar olub.
Konfransda Elm və Təhsil Nazirliyinin Bioresurslar İnstitutunun direktoru İmran Qasımov “Azərbaycan tarixinə şəhidlərin qanı ilə yazılmış Zəfər Günü”, AMEA Gəncə Bölməsinin Nizami Gəncəvi Mərkəzinin direktoru Əlimuxtar Muxtarov “İlahi və dünyəvi ədalətin təntənəsi — Qarabağ zəfəri”, AMEA Gəncə Bölməsinin Diyarşünaslıq İnstitutunun böyük elmi işçisi Mətanət Əliyeva “Şuşa zəfəri tarixi qələbəmizin qürur səhifəsidir”, AMEA Gəncə Bölməsinin Elmi katibi Elnur Həsənov “Müzəffər Ali Baş Komandanın qələbəsi gənclər üçün örnəkdir”,Elm və Təhsil Nazirliyinin Aqrar Problemlər İnstitutunun direktoru Sədaqət Adıgözəlova “Qarabağ zəfərindən Zəngəzura gedən yol”, AMEA Gəncə Bölməsinin İctimaiyyətlə əlaqələr şöbəsinin müdiri Zakir Muradov “Azərbaycanın qələbəsinin beynəlxalq geosiyasi təhlükəsizliyin təminatı proseslərində rolu”, AMEA Gəncə Bölməsi Elmi kitabxanasının müdiri Vüsalə Hüseynova “Qarabağ zəfərinin müasir elmi ədəbiyyatlarda əks olunması” mövzuları üzrə məruzələrlə çıxış ediblər.
Toplantıda, həmçinin AMEA Gəncə Bölməsi Həmkarlar təşkilatının sədri Nailə Hacıyeva çıxış edərək bölmə rəhbərliyinin qərarı ilə burada çalışan, torpaqlarımızın bütövlüyü naminə birinci və ikinci Qarabağ müharibələrində döyüşmüş əməkdaşlara Zəfər Günü münasibətilə pul mükafatlarının ayrılması barədə məlumat vermişdir.
Gəncə Şəhər İcra Hakimiyyətinin şöbə müdiri Yadigar Bədəlov Zəfər Gününə həsr edilən bu tədbirin yüksək səviyyədə keçirildiyini qeyd edərək akademik Fuad Əliyevin rəhbərliyi altında AMEA Gəncə Bölməsinin şəhərin ictimai həyatında da daim fəal mövqe tutuduğunu bildirmişdir.
Hamlet QASIMOV,
XQ –nin bölgə müxbiri
