Nar qabıqlarının tərkibində antioksidantlar, orqanik turşular, büzücü maddələr və s. boldur. Buna görə ondan xalq təbabətində müalicəvi vasitə kimi istifadə olunur.
Nar qabıqları ürək əzələsini qoruyur, damarları möhkəmlədir və təmizləyir. Ürək xəstəlikləri zamanı 1 orta ölçüdə nar qabığının üzərinə 1 stəkan qaynar su əlavə edilib 30 dəqiqə ərzində dəmlənir. Süzdükdən sonra zövqə uyğun bal və zəncəfil əlavə edilib içilir.
Dəmləmə güclü büzücü təsirə malik olduğundan damaq problemləri zamanı da köməyə çatır. Damağı möhkəmlədir, qanamasını azaldır. Dəmləmə ilə ağız gün ərzində bir neçə dəfə qarqara edilir. Diş iltihabında, və ya çəkilməsindən sonra dəmləməyə 1 çay qaşığı duz töküb qarqara etmək lazımdır. Diş çəkiləndən sonra hərdən baş verən qanaxmada nar qabığının dəmləməsi prosesi dayandırır. Ağız boşluğunda istənilən iltihab, yara və s. zamanı da dəmləmə çox yaxşı kömək edir.
Nar qabıqlarının dəmləməsi qurdqovucu təsirə malikdir. Öskürək zamanı da yaxşı kömək edir. Qastrit və mədə xorasında iltihabı azaldır, xora və eroziyaların sağalmasını tezləşdirir, ishalı dayandırır. Onu uşaqlara da vermək olar.
Z.HÜSEYNLİ
XQ