İnsan orqanizmi təbii otlarla daha effektiv müalicə olunur. Lakin bunun üçün həkimlə məsləhətləşmək mütləqdir. Orqanizm fərdi olduğundan bir bitki 2 insana fərqli təsir edə bilər.
Fitoterapevt Olqa Moronun sözlərinə görə, bitkilərin faydalı xüsusiyyətlərini saxlaması üçün məhsul yığımı texnologiyasını bilmək lazımdır. Elə bitki var ki, onu günəş doğmadan yığmaq lazımdır, digərini işıqda və s. Buna görə də dərman bitkilərini aptekdən almaq məsləhətdir. Mədə-bağırsaq problemi olanlar üçün evdə bu bitkilər olmalıdır:
Çobanyastığı. Həzm pozğunluğu, ürəkdə göynəmə, mədədə yüksək turşuluq, həmçinin koliti olan uşaqlar üçün çox təsirli bir vasitədir.
Yovşan. Bu bitkini təşkil edən maddələr şişkinliyi azaldır və həzm şirələrinin sərbəst buraxılmasına kömək edir.
Yaşıl çay. Tərkibində olan katexin flavonoidləri mədə xoralarının sağalmasına kömək edir və təkrar yaranmasının qarşısını alır.
Nanə. Bağırsaqların spazmını aradan qaldırır, ağrıları əhəmiyyətli dərəcədə azaldır. Ürəkbulanmanı götürür və hər hansı həzm pozulmasında faydalıdır.
Bəlğəmotu. Bu bitkini su ilə qarışdırıb içəndə mədəaltı vəzin selikli qişasına yaxşı təsir edir. Mədə xorası və kolitdə də çox faydalıdır.
Mütəxəssislərin fikrincə, bunlardan başqa, aloe, şüyüd toxumu, zəncəfil, kələm suyu, zərdəçal, alma sirkəsi də həzm orqanlarına faydalı təsir göstərir.
Z.HÜSEYNLİ, “Xalq qəzeti”
