22 İyul Milli Mətbuat və Jurnalistika Günü münasibətilə bu il də ölkənin hər yerində dövlət və vətəndaş qurumları, ayrı-ayrı idarə və təşkilatlar müxtəlif tədbirlər keçirib. Bu görüşlərdə medianın müstəqillik və demokratiya şəraitində misilsiz rolu vurğulanıb, jurnalistlərimizə ölkənin geniş oxucu, dinləyici və tamaşaçı auditoriyasının sevgi-sayğısı ifadə olunub, təbrikləri çatdırılıb.
Bakı
Paytaxtın Nəsimi rayonunda milli jurnalistikamızın təməl günü münasibətilə ölkə mediasının təmsilçiləri ilə görüş keçirilib.
Nəsimi Rayon İcra Hakimiyyətində təşkil edilən toplantıda rayon icra başçısı Asif Əsgərov qonaqları salamlayaraq bildirib ki, yaranmasının 148 illiyini qeyd etdiyimiz Azərbaycan Milli Mətbuatı böyük və şərəfli inkişaf yolu keçmiş, bütün dövrlərdə qabaqcıl ideyaların carçısı olub. Mətbuatımız mütərəqqi ənənələri formalaşdıraraq cəmiyyət qarşısında üzərinə götürdüyü missiyanı layiqincə yerinə yetirib. Azərbaycan mediasını milli maraqlar zəminində inkişafı isə ulu öndər Heydər Əliyevin adı ilə bağlıdır.
Rayon rəhbərliyinin kütləvi informasiya vasitələri ilə sıx və məhsuldar əlaqələrə hər zaman mühüm əhəmiyyət verdiyini qeyd edən Asif Əsgərov vurğulayıb ki, bu əməkdaşlıq paytaxtın mərkəzi rayonunun hərtərəfli inkişafına geniş ictimai dəstər qazandırır. Prezident İlham Əliyevin islahatlar, tərəqqi strategiyasının uğurla həyata keçirilməsində də ölkənin demokratik KİV-ləri önəmli rol oynayır.
“Bakı Xəbər” qəzetinin baş redaktoru Aydın Quliyev, YAP Nəsimi rayon təşkilatının sədri Azər Süleymanov və digər çıxış edənlər milli mediamızın tarixi ənənələrinin müstəqillik illərində uğurla davam etdirilməsindən söz açmış, milli maraqların qorunmasında jurnalistlərin fədakar fəaliyyətini vurğulamışlar.
Görüşdə rayon ictimaiyyətinin media təmsilçilərinə təbrikləri çatdırılıb, Nəsimi RİH-in hədiyyələri təqdim olunub.
***
Milli Mətbuat və Jurnalistika Günü münasibətilə Qaradağ Rayon İcra Hakimiyyətində də tədbir keçirilib.
Qaradağ Rayon İcra Hakimiyyəti başçısının birinci müavini Emil Abbasov media nümayəndələrini təbrik edib, 148 illik tarixi olan Azərbaycan milli mətbuatının özünəməxsus ənənələr yaratdığını diqqətə çatdırıb. Bildirilib ki, Ümummilli lider Heydər Əliyev demokratik dövlət quruculuğu prosesində kütləvi informasiya vasitələrinin rolunu daim yüksək qiymətləndirərək, Azərbaycanda senzuranın ləğvi və bir sıra digər tədbirlərlə mətbuatın inkişafına böyük dəstək verib.
Qaradağ Rayon İcra Hakimiyyəti başçısının müavini Nadir Muradov, RİH aparatının ictimai-siyasi və humanitar məsələlər şöbəsinin müdiri Munis Bayramov qeyd ediblər ki, mətbuatımızın inkişafına, jurnalistlərin sosial müdafiəsinin gücləndirilməsinə yönəlmiş siyasət bu gün Prezident İlham Əliyev tərəfindən ardıcıl surətdə və daha geniş miqyasda davam etdirilir.
Tədbirin sonunda Qaradağ Rayon İcra Hakimiyyəti adından KİV nümayəndələrinə hədiyyələr verilib.
***
Azərbaycan Həmkarlar İttifaqları Konfederasiyası 22 İyul Milli Mətbuat və Jurnalistika Günü münasibətilə ölkənin aparıcı media qurumlarını təbrik edib, bir qrup jurnalisti pulla mükafatlandırıb, ehtiyacı olanlara yardım göstərib.
Mədəniyyət İşçiləri Həmkarlar İttifaqı Respublika Komitəsi isə qurumun üzvü olan redaksiyaların kollektivlərinə bayram sovqatı olan bağlamalar göndərib. “Xalq qəzeti”nin kollektivi də bu sıradadır. Redaksiyamız göstərilən diqqətə, səmimi təbriklərə və sovqata görə AHİK-in və sahə həmkarlar ittifaqının rəhbərliyinə təşəkkürünü bildirir.
***
İyulun 21-də Azərbaycan Teatr Xadimləri İttifaqının təşkilatçılığı ilə Milli Mətbuat Günü münasibətilə keçirilən mükafatlandırma mərasimində bir sıra jurnalistlərə İttifaqın fəxri fərmanları təqdim olunub.
Tədbirdə Azərbaycan Teatr Xadimləri İttifaqı sədrinin vəzifə səlahiyyətlərini icra edən Xalq artisti Hacı İsmayılov Azərbaycan mətbuatının keçdiyi şərəfli yoldan danışaraq, media nümayəndələrini bayram münasibətilə təbrik edib və onlara gələcək işlərində uğurlar arzulayıb. O, kütləvi informasiya vasitələri ilə əlaqələrin inkişafından məmnunluq ifadə edilib, faydalı əməkdaşlığın bundan sonra da uğurla davam edəcəyinə əminlik bildirilib.
Sonda teatr sənətinin inkişafındakı xidmətlərinə görə və Milli Mətbuat Günü münasibətilə media nümayəndələri təltif ediliblər. Fəxri fərmanla mükafatlandırılanlar onlara göstərilən diqqətə görə İttifaqın rəhbərliyinə dərin təşəkkürlərini bildiriblər.
***
Dünən “Nar” şirkəti əlamətdar gün münasibətilə media nümayəndələrini ənənəvi olaraq təşkil olunan intellektual yarışmada bir araya gətirib.
20-dən çox media orqanını təmsil edən jurnalistlər 7 komandada biliklərini yarışdırıblar. Builki yarışmada iştirakçılara 7 tur boyunca milli və dünya mədəniyyətinə, tarixə, texnologiyaya aid müxtəlif çətinlikdə suallar verilib. Bununla yanaşı, komanda quruculuğu oyunları ilə media nümayəndələrinin bir-biri ilə daha yaxından tanışolma fürsəti olub.
Qaliblərin seçimi zamanı həm intellekt yarışının xalları, həm də komanda quruculuğu oyununun nəticələri nəzərə alınıb. Nəticə etibarilə, yarışda qalibiyyəti “Ziya” komandası qazanıb, “Yeni Həyat” komandası 2-ci, “Molla Nəsrəddin” komandası isə 3-cü yerləri tutublar. Qalib komandalara “Nar” tərəfindən xüsusi hədiyyələr təqdim edilib.
***
Milli Mətbuat Günü münasibətilə M.F.Axundzadə adına Azərbaycan Milli Kitabxanasının əməkdaşları “22 İyul – Milli Mətbuat Günü” adlı virtual sərgi hazırlayıblar.
Virtual sərgidə Azərbaycan Milli Mətbuatının inkişafına dair rəsmi sənədlər, görkəmli şəxslərin milli mətbuatımız haqqında fikirləri, fotolar, mətbuat və jurnalistikamızın inkişaf tarixini əks etdirən kitab və məqalələr nümayiş olunur.
Virtual sərgi ilə tanış olmaq istəyənlər http://anl.az/el/vsb/22_iyul/index.html linkindən istifadə edə bilərlər.
***
Dünən Bakıdakı Rus evində də Azərbaycanda geniş qeyd olunan Milli Mətbuat Günü münasibətilə jurnalistlərin mükafatlandırılması mərasimi keçirilib.
“Rossotrudniçestvo”nun Azərbaycan Respublikasındakı nümayəndəliyinin rəhbəri İrek Zinnurov jurnalistləri peşə bayramları münasibətilə təbrik edib, onlara gələcək uğurlar arzulayıb. Bildirilib ki, 1875-ci il iyulun 22-də dövrünün maarifçilik hərəkatının görkəmli nümayəndələrindən olan Həsən bəy Zərdabinin təsis etdiyi “Əkinçi” qəzetinin ilk nömrəsi işıq üzü görüb. Zəngin tarixə malik Azərbaycan milli mətbuatı ölkənin ictimai-siyasi həyatında mühüm rol oynayıb və oynamaqda davam edir.
Sonra medianın ən çox fərqlənən nümayəndələrinin mükafatlandırılması mərasimi olub. Jurnalistlərə informasiya sahəsində uğurlu əməkdaşlığa görə fəxri diplomlar təqdim olunub.
Naxçıvan
Naxçıvan Muxtar Respublikasının İnsan Hüquqları üzrə Müvəkkili (Ombudsman) və “Şərq qapısı” qəzetinin birgə təşkilatçılığı ilə 22 İyul Milli Mətbuat və Jurnalistika Gününə həsr olunmuş “Heydər Əliyev və milli mətbuat” mövzusunda toplantı keçirilib.
Məclisi giriş sözü ilə “Şərq qapısı” qəzetinin baş redaktoru, Naxçıvan Muxtar Respublikasının Əməkdar jurnalisti Mehriban Sultanova açaraq bildirib ki, Azərbaycan ictimaiyyəti 2 mühüm tarixi hadisənin – Ümummilli liderin doğma Naxçıvana qayıdışının və milli mətbuatın yaranmasının ildönümünü qeyd edir. Ulu öndər respublikada hakimiyyətinin hər iki dövründə mətbuata həmişə böyük yaradıcılıq sərbəstliyi, demokratik meydan yaradıb, müstəqil, demokratik mətbuatın inkişafına xüsusi əhəmiyyət verib.
Naxçıvan Muxtar Respublikasının İnsan Hüquqları üzrə Müvəkkili (Ombud-sman) Aparatının şöbə müdiri Vahidə Bayramova, Naxçıvan Mətbuat Şurasının sədri Rövşən Hüseynov, Naxçıvan Muxtar Respublikası Televiziya və Radio Şurasının əməkdaşı Zilhiccə Abdullayeva milli jurnalistikamızın şanlı tarixindən və demokratik cəmiyyətdə oynadığı önəmli roldan söhbət açıblar.
Çıxış edənlər Azərbaycan mediasının nümayəndələrini səmimi təbrik edib, onlara yeni yaradıcılıq uğurları arzulayıblar.
Sumqayıt
Sumqayıtda da 22 İyul Milli Mətbuat və Jurnalistika Gününə həsr edilən silsilə tədbirlər keçirilib.
Şəhər icra hakimiyyəti başçısının 1-ci müavini Teymur Səmədov, İcra aparatının məsul əməkdaşları Fərman Kazımov və Eyvaz Qocayev Əməkdar jurnalist Rəhman Orxana evində baş çəkiblər. Qeyd edək ki, Rəhman Orxan uzun illər “Vışka” qəzetinin xüsusi müxbiri vəzifəsində çalışıb, 90-cı illərdə özünün təsis etdiyi “Bakinets” qəzetində isə ulu öndərin siyasi hakimiyyətə qayıdışının vacibliyi haqqında cəsarətli yazılarla çıxış edib. Bir neçə il bundan öncə təqaüdə çıxmış Əməkdar jurnalist hazırda səhhəti ilə əlaqədar işləmir.
Qonaqlar peşə bayramı münasibətilə Rəhman Orxanı şəhər rəhbərliyi adından təbrik edərək ona ən xoş arzularını bildiriblər. Rəhman Orxan Milli Mətbuat və Jurnalistika Günü ərəfəsində onu yad etdiklərinə, diqqət və qayğı göstərdiklərinə görə Sumqayıt Şəhər İcra Hakimiyyəti aparatının əməkdaşlarına dərin minnətdarlığını bildirib.
Masallı
Masallı Rayon İcra Hakimiyyətinin təşkilatçılığı ilə Milli Mətbuat və Jurnalistika Günü ilə əlaqədar tədbir keçirilib.
Heydər Əliyev Mərkəzində təşkil olunan dəyirmi masada rayon icra hakimiyyəti başçısı Araz Əhmədov 22 İyul Milli Mətbuat və Jurnalistika Günü münasibəti ilə qələm sahiblərini təbrik edib. Natiq bildirib ki, 148 il öncə nəşrə başlayan “Əkinçi” qəzeti Azərbaycanın milli mətbuatının əsasını qoydu. Həsən bəy Zərdabinin naşirliyi ilə işıq üzü görən “Əkinçi” bəlkə də necə böyük bir ənənənin başlanğıcında dayandığının fərqində deyildi. Amma bir məsələ faktdır ki, məhz “Əkinçi”nin ardından dünya mətbuatı müstəvisinə can atan Azərbaycan mətbuatı ötən 148 ildə böyük inkişaf yolu keçib.
Sonra YAP Masallı Rayon Təşkilatının sədri Seyfəddin Əliyev, “Respublika” qəzetinin bölgə müxbiri Əlisəfa Həsənov, “Yeni həyat” rayon qəzetinin baş redaktoru Əlihuseyn Şükürov, “Azərbaycan” qəzetinin bölgə müxbiri Seyran Cavadov, Rayon Ağsaqqallar Şurasının sədri Ələşrəf Niftiyev və başqaları milli jurnalistikamızın uğurlarından və qarşıda duran vəzifələrdən danışıblar.
Göyçay
Rəsul Rzanın ev-muzeyində MilliMətbuat Günü ilə əlaqədar “Heydər Əliyev və Azərbaycan mətbuatı” mövzusunda dəyirmi masa keçirilib.
“Göyçay” qəzetinin redaktoru, Əməkdar müəllim Adil Məmmədov milli mətbuatın yaranma tarixindən danışaraq bildirib ki, Azərbaycan mediası yarandığı ilk gündən qabaqcıl ideyaların–maarifçiliyin, milli azadlığın, demokratik fikrin carçısı olub. Həsən bəy Zərdabi “Əkinçi” qəzetini yaratmaqla cəmiyyətin inkişafında, mənəvi, siyasi, əxlaqi təkamülündə müstəsna rol oynayıb.
Dəyirmi masada çıxış edən “Ədalət” qəzetinin redaktor müavini Məzahir Əhmədov və digərləri bildiriblər ki, Azərbaycan mediası həm Birinci, həm də İkinci Qarabağ müharibələrində üzərinə düşən vəzifəni layiqincə yerinə yetirib, xalqın böyük Zəfərinin müjdəçisi olub. Hər zaman Azərbaycan həqiqətlərinin təbliği missiyasını uğurla həyata keçirən mətbuatımız 44 günlük Vətən müharibəsinin gedişində ölkəmizin düşmən təbliğatına qarşı informasiya mübarizəsinə töhfələrini verdiyi kimi, postmüharibə dövründə də bu işi davam etdirməkdədir.
Görüşdə Ulu öndər Heydər Əliyevin siyasi kursunu uğurla davam etdirən Prezident İlham Əliyevin Azərbaycanda jurnalistikanın inkişafına göstərdiyi hərtərəfli dəstəkdən, mətbuat işçilərinin sosial müdafiəsinin gücləndirilməsi istiqamətində gördüyü tədbirlərdən də geniş bəhs edilib.
Naftalan
Naftalan Şəhər İcra Hakimiyyətinin təşkilatçılığı ilə Milli Mətbuatın 148-ci ildönümü münasibətilə bir qrup media nümayəndəsi ilə görüş keçirilib.
Dəyirmi masa arxasında keçirilən səmimi görüşdə şəhər icra hakimiyyətinin başçısı Vüqar Novruzov Azərbaycan milli mətbuatının olduqca böyük tarixi inkişaf yolu keçdiyini qeyd edərək kütləvi informasiya vasitələrinin insanların maariflənməsi, milli şüurun formalaşması, xalqımızın azadlıq amallarının gerçəkləşməsi və mənəvi dəyərlərimizin qorunmasına mühüm töhfələr verməsindən söhbət açıb, Ulu öndərin mətbuata və mətbuat nümayəndələrinə göstərdiyi diqqət və qayğının Prezidentimiz İlham Əliyev tərəfindən uğurla davam etdirilməsindən danışıb, jurnalistlərə çətin və şərəfli işlərində uğurlar arzulayıb.
Çıxış edənlər Azərbaycan mətbuatının yüksək dövlət dəstəyi və qayğısı ilə əhatə olunması, bu istiqamətdə ardıcıl və məqsədyönlü islahatların həyata keçirilməsi nəticəsində köklü dəyişikliklərin baş verdiyini qeyd edib və buna görə ölkə rəhbərinə minnətdarlıqlarını bildiriblər.
Tədbirin sonunda ŞİH tərəfindən mətbuat nümayəndələrinə xatirə hədiyyələri təqdim olunub.
T.RÜSTƏMLİ,
Ə. ƏLİYEV,
H.QASIMOV,
S.HƏSƏNOV,
“Xalq qəzeti”