Düz 30 il əvvəl çalışdığımız dövlət televiziyasından ağsaqqal yazıçımız Vidadi Babanlı ilə Qərb bölgəsinə ezamiyyətə getmiş, AYB Qazax bölməsinin sədri, şair Barat Vüsalla əsgərlərin görüşünə yollanmışdıq. O zaman oxunan şeirlər, söylənən fikirlər Vətən müdafiəçilərini xeyli ruhlandırdı, hətta onlardan bir neçəsi ürəklənərək səngər şeirlərindən nümunələr səsləndirdilər.
Ötən ilin yayında Şuşada Vaqif Poeziya Günlərində “İgidlərin sözü” kompozisiyasında qazi-şairlərin muğamın müşayiəti ilə çıxışları bir daha həmin günləri, əsgərlərin barıt qoxulu misralarını yada saldı.
İkinci Qarabağ müharibəsinin səngərlərində neçə-neçə döyüşçü-şairimiz vuruşub. Onlardan bəziləri döyüş meydanlarında müqəddəs şəhidlik zirvəsinə ucalıb, sağ qalanlarsa, Barat Vüsalın təbirincə desək, hələ də səngərdədirlər: “Neçə ki, Vətən var, torpaq var, bayraq var, həmişə də səngərdə olacaqlar. Onlardan biri, istedadı yüksək qiymətləndirilmiş baş leytenant Emin Piri II Qarabağ müharibəsinin son dərəcə orijinal gündəliyini yazdı. Həm də yolboyu gedə-gedə şahanə misralar dedi:
Formamda şair qardaşlarımın qanı,
Gözlərimdə 44 günlük gecənin yuxusuzluğu.
Bu qazilərin qələmləri güllə gilizləri olub, onu öz qanlarına batırıb şeirlərini yazıblar. Varaqları olmadığı üçün duyğularını ürəklərinə, yaddaşlarına həkk ediblər. Sonradan vaxt tapıb "köçürə" biliblər, biz də xəbər tutaq, oxuyaq, bilək deyə!
Allah üstümüzdən çəkməsə əlin,
Birgə yandırarıq zəfər məşəlin!
Hamının qorxduğu zalım əcəlin
Boyu boyumuzdan bəstədir, qızım!
Həsən Kür adlı qazi-şairin bu misralarını oxuyuram və özümdən asılı olmadan ayağa dururam, "Azərbaycan əsgərinə (şəhidinə, qazisinə, şairinə) eşq olsun!" deyirəm. Düşünürəm ki, qazi şeirlərinin hər birini oxuduqca ayağa durmaq lazımdır. Şəhid önündə sayğı duruşuna dayanan kimi... Vətən müharibəsi haqqında şeirləri, qalib əsgər və zabitlərimizin ağrı-acılarını qazi-şairlər bizdən daha inandırıcı şəkildə ifadə edə bilirlər”.
“Zəfər yürüşü”nə qoşulanlardan Eyvaz Əyyub, Səbuhi Qurbanov, Oğuz Alparslan, Nicat Ağayev, Cavid Əlioğlu, Orxan Səmədov, Elvin İntiqamoğlu və başqaları bu gün dinc quruculuq cəbhəsində çalışmaqda, həm də dava yaşantılarını özlərinə məxsus tərzdə yazmaqdadırlar. Onlardan bəzi nümunələrə nəzər salaq:
Üçrəngli bayrağı sanc köksümə, övlad,
Fərz eylə, ağır xəstəyə imdad eləyirsən.
(Səbuhi Qurbanov)
***
Qurban bu can hər daşına,
Hər zərrənə, qarışına!
Bir gün ölsəm, başdaşıma
Yazılsın tarix daşıma:
"Canım qurban, Azərbaycan!"
(Oğuz Alparslan)
***
Şamaxıdan çıxdıq yola,
Baxmadıq heç sağa, sola.
Ermənidə niyə qalsın
Torpaq bizim ola-ola!
(Orxan Səmədov)
***
Noyabrın yeddisi,
Xocavənd ərazisi:
Bir tərəfdə əsgərlərin döyüşdən çıxardığı
baş leytenant Əsədov...
Bir tərəfdə yerə düşmüş rabitə:
- Qaya on bir... Qaya on bir...
Qaya on bir eşitmir!
(Elvin İntiqamoğlu)
Göründüyü kimi, həm əsl Vətən övladları, Vətən əsgərləridir, həm də mənalı misralar yazır qazi-şairlərimiz. Onların şeirləri “Zəfər yürüşü”müzə, Böyük Qələbəmizə çox yaraşır. Ruhumuzun yaylım atəşləri kimi!
Nəhayət, qazi-şairlərimizdən seçdiyimiz iki şeirlə Vətən müharibəsində qələmini süngüyə çevirmiş soydaşlarımız haqqında qeydlərimizi tamamlayırıq.
QARABAĞIM
Verib sənə söz, gəlmişik,
Polad, Mübariz gəlmişik.
Qarabağım, biz gəlmişik,
Salam verir daşım, dağım,
Gözün aydın, Qarabağım!
Gözü qanlı qurdu gördüm,
Dəmir yumruq ordu gördüm.
Xalq ayağa durdu, gördüm,
Cəngi eşitdi qulağım,
Gözün aydın, Qarabağım!
Səbuhi QURBANOV
MƏN VƏTƏNƏM
Adım bəlli, soyum bəlli, köküm bəlli,
Bir gün gedib Göyçə göldə
Qarmağımı atacağam,
Orda balıq tutacağam,
Bişirəcəm Ərdəbildə.
Mən Vətənəm!
Qapınızı döydüyümdə
Düşünmədən açın, mənəm.
Zəncan, Xoyam, Borçalıyam,
Şuşa mənəm, Laçın mənəm!
Nicat AĞAYEV
Əli NƏCƏFXANLI, “Xalq qəzeti”