Mayın 12-də “Xalq qəzeti” redaksiyasında Azərbaycan Mətbuat Şurası Ahıl Jurnalistlər Məclisinin təşkilatçılığı ilə mərhum tədqiqatçı, jurnalist, yazıçı-publisist, Əməkdar mədəniyyət işçisi Ənvər Çingizoğlunun vəfatından sonra işıq üzü görmüş, çoxillik tədqiqatlarının nəticəsi olan “Qarabağ ruhaniləri” kitabının təqdimatı keçirilib. 

“Xalq qəzeti”nin baş redaktoru Əfla­tun Amaşov qeyd edib ki, Azərbaycan Respublikası Dini Qurumlarla İş üzrə Dövlət Komitəsinin nəzdində fəaliy­yət göstərən Mənəvi Dəyərlərin Təb­liği Fondunun maliyyə dəstəyi ilə işıq üzü görmüş bu kitab milli tariximizin mühüm səhifələrindən olan Qarabağ din xadimlərinin və inanc adamlarının yaradıcılığının dünyaya tanıdılması baxımından qiymətli nəşrdir. Natiq qeyd edib ki, bu kitabın indi – İkinci Qarabağ müharibəsindəki tarixi Qələbədən son­ra başdan-başa yenidən qurulan və bərpa edilən Qarabağda gedən quru­culuq işləri və mədəni bərpa layihələri ilə üst-üstə düşməsi də təsadüfi deyil. 

Ahıl Jurnalistlər Məclisinin sədri Ta­hir Aydınoğlu qeyd edib ki, bu qəbildən olan tədbirlərin keçirilməsi bir tərəfdən dünyasını dəyişmiş həmkarlarımızın xatirəsinin anılması, ehtiramla yad edil­məsidirsə, digər tərəfdən də gərgin axtarışların nəticəsi olan dəyərli tarixi materialların təbliği baxımından xü­susi önəm kəsb edir. O əlavə edib ki, biz “Xalq qəzeti” redaksiyası olaraq, mətbuatımızın inkişafına, milli-mənəvi dəyərlərimizin təbliğinə töhfələr vermiş istənilən kitabın təbliğində maraqlıyıq. 

Mənəvi Dəyərlərin Təbliği Fondu­nun sədr müavinin Hatəm Gülməmmə­dov, Ahıl Jurnalistlər Məclisi sədrinin müavini Əminə Yusifqızı, məclisin üzv­lərindən Tahir Talıblı, Valeh Mirzə, Akif Cabbarlı, Vasif Quliyev, Mübariz Süley­manlı, kitabın elmi redaktoru, dosent Şəhla Nuruzadə, tarixçi alim Nazim Qafuroğlu, rəssam Rafael Gülməmmə­dov, Ənvər Çingizoğlunun bacısı Arəstə Ağakişiyeva, qardaşı Tapdıq Əzimov, Şuşa sakini, keçmiş hərbçi Fəxrəddin Səfərov və digər natiqlər Ənvər Çingi­zoğlu yaradıcılığının bədii və elmi mə­ziyyətlərindən söz açmış, onun çoxsaylı tədqiqat əsərlərindən, yorulmaz fəaliy­yətindən danışmış, doğulub böyüdüyü Füzuli rayonunda xatirəsinin əbədiləş­dirilməsini təklif etmişlər. 

Xatırladaq ki, ötən il 60 yaşı tamam olmuş Ənvər Çingiz oğlu Fərəcov 1990-cı ildə Bakı Dövlət Universitetinin Jurna­listika fakültəsini bitirmişdi. Bir müddət Füzuli rayonundakı “Araz” qəzetində ədəbi işçi, 1994–2014-cü illərdə Azər­baycan Televiziyası və Radiosunda müxtəlif vəzifələrdə işləmişdi. 2014-cü ildən “Azərbaycantelefilm” Yaradıcılıq Birliyində baş redaktorun müavini olub, eyni zamanda “Soy” dərgisinin baş re­daktoru kimi fəaliyyət göstərirdi.

İstedadlı və çalışqan soydaşımız ömrünün 30 ilə yaxın bir dövrünü Azər­baycan xalqının folklor və etnoqrafi­yasının araşdırılmasına həsr etmişdi. Həmçinin ölkəmizin xanlıqlar dövrü, Cənubi Azərbaycan tarixi, eləcə də Qa­rabağ elinin məşhur simaları ilə bağlı tədqiqatlar aparmış, bir sıra məşhur soyların şəcərəsini öyrənmişdi. Həmin istiqamətdəki araşdırmalarının nəticələ­ri onlarla kitab vasitəsilə ictimaiyyətə çatdırılmışdır. Tərtib etdiyi “Məhəmməd bəy Aşiqin şeirləri”, “Rzaqulu bəy Vəzi­rovun əsərləri”, “Qarabağ 1918–1920-ci illərdə”, “Bayram xan Baharlı. Əsərləri” , “Məhəmməd Rəfi Ənsari. Dəstur ül-mü­luk” , “Mirzə Rza xan Ərfə. Xatirat” və başqa kitabları ölkəmizdə və xaricdə maraqla qarşılanmışdır.

Televiziya tamaşaçıları onun senari­si əsasında çəkilmiş “Avşarlar”, “Xur­şidbanu Natəvan”, “Zəngəzur qartalı”, “Nəvvab”, “Sarı simin sızıltısı” , “Kə­minə” və başqa sənədli filmləri də ma­raqla izləmişlər. 

... Tədbir keçirilən zalda – onun fo­tosunun önünə qızıl güllərin ən ətirlisi olan Qırxyarpaq güllər də düzülmüşdü. Redaksiyadan Qarabağın ətri gəlirdi. 

İttifaq MİRZƏBƏYLİ, 

“Xalq qəzeti”, 

Foto Səbuhi MƏMMƏDOVUNDUR