Yaz fəslində xalqımızın ləzzətlə yediyi nemətlərdən biri də dadı damaqlardan getməyən, təzə-tər göyərtidən hazırlanan kətədir. Mətbəx ustalarının “göy qutabı” adlandırdığı kətə Naxçıvanda da çox sevilir və yerli özünəməxsusluqla hazırlanır.
Naxçıvan kətəsi çöl-bayırda bitən şomu, çiriş, gicitkən, qazayağı, quzuqulağı, əvəlik və digər pencərlərdən hazırlanır, zəngin tərkibi və müalicəviliyi ilə seçilir. Son illərdə ailə təsərrüfatlarının məşguliyyətində də yer tutmağa başlayan kətəhazırlama yeni bir mətbəx təntənəsinin də əsasını qoyub. Artıq beşinci dəfə Naxçıvan şəhərində keçirilən “Kətə” festivalı milli mətbəximizin yaşadılması və tanıdılması baxımdan yerli əhalinin böyük marağına səbəb olur, yaxın-uzaqlarda da əks-səda doğurur.
Aprelin 7–8-də Naxçıvan şəhərində yerləşən “Naxçıvanqala” Tarix-Memarlıq Muzey Kompleksində keçirilən “Kətə” festivalında bu dəfə 200-ə yaxın kətəçi iştirak edib. Müxtəlif yabanı göyərti növlərindən hazırlanan, təndirdə, sac üzərində, yagda bişirilən kətələr, dürməklər iştirakçılar tərəfindən böyük maraqla qarşılanıb. Festival çərçivəsində Naxçıvan Muxtar Respublikası Ailə Qadın və Uşaq Problemləri üzrə Dövlət Komitəsinin təqdimatı ilə 90-a yaxın qadının 3 mindən artıq, Naxçıvan Biznes Mərkəzinin cəlb etdiyi 15 yerli sənətkarın isə 84 adda əl işi satışa çıxarılıb.
Festivalda muxtar respublikanın istehsal müəssisələri və iaşə obyektləri də sakinlərə və qonaqlara xidmət göstərib. Naxçıvan Muxtar Respublikasının Mədəniyyət Nazirliyinin təşkil etdiyi konsertlər isə festivala çal-çağır əhvalı gətirib.
Şənliyin ikinci günü “Ən dadlı kətə” nominasiyası üzrə müsabiqə də təşkil edilib. Münsiflər heyəti tərəfindən görünüşünə, çeşid müxtəlifliyinə və dadına görə ən yaxşı kətə bişirən 3 nəfər I yer, 3 nəfər II yer, 3 nəfər isə III yerə layiq görülüb. Qaliblərə diplomlar təqdim olunub.
S.HƏSƏNOV,
“Xalq qəzeti”
Naxçıvan
