Hindistanın baş naziri Narendra Modi Ukraynaya baş çəkdi. Modinin Kiyevə səfərinin qısamüdətli olmasını təhlükəsizliklə əlaqələndirirlər. Bu, müstəqillik dövründə Hindistan hökumət başçısının Ukraynaya ilk rəsmi səfəridir. Ukrayna Prezidenti Volodimir Zelenski ilə görüşdən sonra hindli nazir Kiyevi tərk etdi. Gözlənildiyi kimi, iki lider arasında danışıqlar ümidverici nəticə ilə yekunlaşmadı.
İyul ayında Hindistanın baş naziri Narendra Modi Moskvaya səfər etmiş və Rusiya Prezidenti Vladimir Putin ilə görüşmüşdü. Həmin gün Rusiya Ukraynaya aviazərbələr endirmişdi. Modinin Moskvaya səfəri Kiyevdə məyusluqla qarşılanmışdı. Ukrayna Prezidenti Volodimir Zelenski Hindistanın baş nazirinin iyulun 8-9-da Moskvaya səfərini və Putinlə görüşünü “böyük məyusluq” və “sülh səylərinə sarsıdıcı zərbə” adlandırmışdı. Qərb ölkələri də hindistanlı baş nazirin Moskva səfərini tənqid etmişdi.
Xatırladaq ki, Modi Rusiya lideri ilə görüşdə bildirmişdi ki, müharibə problemlərin həlli ola bilməyəcək. O, həmçinin Moskvada aparılan danışıqlar zamanı Ukrayna mövzusu ilə bağlı “açıq şəkildə” fikir mübadiləsi aparıldığını və danışıqlar nəticəsində “çox maraqlı ideyalar yarandığını” qeyd etmişdi. Modi həmin ideyaların nədən ibarət olduğunu açıqlamasa da, Rusiya liderini dinləyərkən özünü “nikbin hiss etdiyini” vurğulamış, iki tərəfin “tezliklə sülhün bərqərar olması” zərurəti ilə razılaşdığını demişdi. Səfərdən sonra belə bir məlumat yayılmışdı ki, Hindistan Rusiya ilə Ukrayna arasında birbaşa vasitəçi olmayacaq, lakin bu ölkələr arasında məlumatlar ötürə bilər. İndi həmin mesajları Zelenskiyə çatdırmaq üçün Modi Kiyevə gəldi.
Bəs Modinin səfərinin Rusiya-Ukrayna müharibəsinə təsiri olacaqmı və Hindistan Rusiyaya təzyiq edəcəkmi? Mütəxəssislər buna inanmırlar. “Foreign Policy” dərgisi yazır ki, Modinin Zelenski ilə görüşünün hər hansı mühüm nailiyyətlərə gətirib çıxaracağı ehtimalı azdır. Ən yaxşı halda Hindistan Ukraynaya hansısa humanitar yardım təklif edə bilər. İkitərəfli danışıqlar iki saata yaxın bağlı qapılar arxasında keçdi və danışıqlardan sonra mətbuat konfransı keçirilmədi. Bununla yanaşı, Modi Kiyevdən əliboş qayıtmadı. Ukrayna və Hindistan liderlərinin iştirakı ilə dörd sənəd imzalandı.
“Associated Press” isə yazır ki, səfər Hindistanın “Rusiyaya meyilli” kimi göründükdən sonra daha neytral mövqe tutmaq cəhdindən xəbər verir. Mütəxəssislərin fikrincə, səfər Modinin iyulda Putinlə görüşünü tənqid edən ABŞ və digər Qərb ölkələrində yaxşı qarşılanacaq. Siyasi analitiklərin sözlərinə görə, Modi üçün səfər “Zelenskini cəlb etmək və Hindistanın maraqlarını təmin etmək, Rusiyanın böyük təsirinə qarşı çıxmaq və Qərbi sakitləşdirmək” üçün bir fürsətdir. Lakin səfər Qərb üçün müsbət siqnal olsa da, onun Hindistanın Moskva ilə daha yaxın münasibətlər saxlaması barədə fikrini dəyişməyəcək.
S.ELAY
XQ
