Müşfiq ƏLƏSGƏRLİ,
XQ-nin media eksperti
Qərbdə anti-Azərbaycan qətnamələri qərəz və sifarişlə qəbul olunur
ABŞ Dövlət Departamenti aprelin 22-də açıqladığı “2023-cü ildə İnsan Haqları Təcrübələri üzrə illik Ölkə Hesabatı”nda insan haqları üçün təhdid yaradan qlobal faktorları sadalayıb. Bu kontekstdə Rusiya – Ukrayna müharibəsinin, Sudandakı daxili iğtişaşların və İsrail – HƏMAS qarşıdurmasının yaratdığı insan faciələrinə geniş yer ayırıb. Paralel olaraq, ayrı-ayrı ölkələrdə təzahür edən insan haqları pozuntularını da sadalayıb və bu sırada Azərbaycana da yer ayırıb.
Hesabatın ölkəmizə aid hissəsi tənqidi ruhlu və qərəzlidir. ABŞ Dövlət Departamenti 2023-cü il sentyabrın 19-20-də Qarabağ regionunda həyata keçirilmiş antiterror tədbirlərini “insan haqları pozuntusu” kimi təsvir edib.
Dövlət Departamentinin illik hesabatı ilə paralel şəkildə – aprelin 23-də ABŞ Konqresində Azərbaycana qarşı sank-siyaları nəzərdə tutan qanun layihəsinin təqdim edilməsinə təşəbbüs göstərilib. Konqresmen Dina Titusun təşəbbüsü ilə hazırlanan və “Azərbaycanda sanksiyalara baxış Aktı” adlandırılan sənəddə II Qarabağ müharibəsinə, o cümlədən, Azərbaycan Ordusunun zəfərinə tənqidi münasibət yer tutur. Sanksiyaya məruz qalmalı olan şəxslərin siyahısına Azərbaycan ordusunun sayılıb-seçilən komandirlərinin adları da daxil edilir.
Bundan cəmi 2 gün sonra – aprelin 25-də Azərbaycan əleyhinə daha bir sənəd Avropa Parlamentində qəbul edilib. Qətnamənin motivi budur ki, guya, ölkəmizdə vətəndaş cəmiyyəti institutlarına qarşı repressiya aparılır və Avropa Parlamenti də bundan narahatlıq keçirir
Hər üç sənədi ortaq nöqtədə birləşdirən məqamlar vardır. İlk olaraq tarixi uyğunluq diqqət çəkir. Adı çəkilən sənədlər cəmi üç gün müddətində – aprelin 22-dən 25-dək meydana çıxıb. Məqsədli olaraq, qondarma “erməni soyqırımı”nın növbəti ildönümündə, 24 aprel ərəfəsində gündəmə gətirilib. Bir növü, ermənilərə hədiyyə kimi təqdim edilib.
Sənədlərdə açıq mətnlə qeyd edilir ki, ABŞ və Avropa Birliyi Azərbaycanın 2023-cü il sentyabr ayında Qarabağ regionunda həyata keçirdiyi antiterror tədbirlərindən məyus olublar. Bölgədə erməni separatizmin kökünün kəsilməsindən narazı qalıblar. Dina Tatusun rəhbərliyi ilə hazırlanıb Konqressə təqdim edilən sənəddə bu motiv daha aydın şəkildə ifadə olunur.
2024-cü ilin yanvar ayında Avropa Şurasında Azərbaycan nümayəndə heyətinə qarşı iddia qaldıranlar da açıq tekstlə bildirirdilər ki, “Dağlıq Qarabağda hümanitar böhranın yaradaılmasından, Laçın dəhlizindən sərbəst keçidin təmin edilməməsindən” qəzəbləniblər.
ABŞ Dövlət Departamentinin, Kon-qresin, Avropa Parlamentinin yaydıqları sənədlərdə anti-Azərbaycan ritorikasının yer almasında “erməni şəbəkəsinin” izi aydın görünür. Onlar erməni şəbəkəsinin təsiri altında addım atdıqlarını gizlətmirlər də. Məsələn, Amerika Erməni Milli Komitəsinin (ANCA) saytında yerləşdirilmiş məlumatlardan belə aydın olur ki, Dina Titusun yaydığı sənəd “lobbiçilik fəaliyyəti” çərçivəsində hazırlanıb. Bunun üçün ANCA-dan ciddi dəstək alınıb.
Məsələyə fərqli kontekstdən yanaşanlar da var. “ABŞ və Avropa İttifaqı Cənubi Qafqazda təmsilçiliyə can atırlar, bu məqsədlə erməni kartından istifadə edirlər” – barədə fikir yürüdənlər də haqlıdırlar. Amma bu iki ideya bir-birinə zidd deyil. Maraqlar qarşılıqlıdır: ABŞ və Avropa İttifaqı erməni kartından istifadə etməyə çalışırlar. “Erməni şəbəkəsi ” də prosesə qatqı verir, rəngləri tündləşdirir. Xüsusi olaraq, “lobbiçilik fəaliyyəti”ndən istifadə edərək, prosesin içində öz maraqlarını təmin etməyə çalışır.
Yaxın tarixdə baş vermiş 2 hadisə prosesə aydınlıq gətirmək üçün yaxşı nümunədir. Məsələn, ABŞ Senatının Xarici əlaqələr Komitəsinin sədri Robert Menendesin işi hazırda məhkəmə araşdırması altındadır. 2023-cü ilin oktyabr ayında ona qarşı rəsmi ittiham elan edilib. Prokurorluq Robert Menendesi Nyu-Cersidən olan 3 biznesmenlə korrupsiya əlaqəsinə girməkdə şübhəli bilir. O və arvadı rüşvət kimi nağd pullar, qızıl külçələr, lüks avtomobillər, digər qiymətli əşyalar almaqda, qarşılığında ABŞ Kənd Təsərrüfatı Nazirliyinin əməkdaşlarına təzyiq göstərərək, qanunsuz qərarlar çıxarmalarına vasitəçilik etməkdə ittiham olunurlar.
Menendes ailəsi qiymətli daş-qaşlar almaq müqabilində xarici ölkələrdən olan qruplar üçün “lobbiçilik etməkdə” də təqsirləndirilir. Əslində, onun “xarici qruplarla” əməkdaşlığı üzrə faktlar yeni deyil. Ermənipərəst, türkofob mövqeyi ilə tanınan Robert Menendes hələ 2022-ciildə erməni lobbisindən rüşvət almaq ittihamı ilə medianın gündəminə gəlmişdi. Amma həmin məlumat ABŞ-nin ümumi siyasi kursuna uyğun görünmədiyi üçün qapadılmışdı. İndi isə Menendesin ABŞ-ninmarağına cavab verməyən qruplarla iş birliyinə girməsi üzrə faktlar tapılıb. Onun məhkəməyə çəkilməsi də bu amillə bağlıdır.
2022-ci ildə “lobbiçilik fəaliyyəti” adı ilə rüşvət alınması faktı Avropa Parlamentində də təsdiqini tapıb. Avropa Parlamentinin sədr müavini Eva Kayli Brüssel polisi tərəfindən saxlanılıb. Belçika Federal Prokurorluğu onun korrupsiya ittihamı ilə saxlanılması üçün sanksiya verib. Kayli futbol üzrə Dünya çempionatının Qətərdə keçirilməsi üçün rüşvət qarşılığında nüfuz təmsilçiliyi etməkdə təqsirləndirilirdi. Amma bu, Eva Kaylinın adının hallandığı ilk rüşvət və korrupsiya qalmaqalı deyil. Avropa Parlamentinə (AP) Yunanıstandan seçilmiş Kayli Avropada fəaliyyət göstərən erməni lobbi qrupları ilə də sıx əməkdaşlıq edib. Bu qruplardan qanunsuz yollarla əldə etdiyi vəsaitlər mövzusunda media gündəminə düşüb. 2021-ci ildə dərc etdiyimiz məqalədə bu mövzuya biz də toxunmuşuq.
“Erməni şəbəkəsi Avropa institutlarını necə yönləndirir?” sərlövhəli məqaləsində Kaylinın erməni şəbəkəsi ilə əməkdaşlığının detallarını açmışıq (https://az.trend.az/azerbaijan/society/3517605.html?fbclid=IwAR3CDHyC__Bj-BvOJjMqDE2oZZ2C6RFAb-t6Mdp00F_35OGzn1ivDURLe18). Bildirmişik ki, 2021-ci il noyabrın 19-da Azərbaycan əleyhinə qəbul edilən bəyanat Avropa Parlamentinin adından elan edilsə də, bəyanatı yalnız 33 nəfər AP üzvü imzalayıb. Həmin 33 nəfər isə Avropa Parlamentində təmsil olunan “Ermənistanla dostluq qrupu”nun üzvləridir. Bəyanatın hazırlanmasında və qəbul etdirilməsində Lukas Furlas, Lefteris Xristofor, Lars Patrik Berq ilə yanaşı, yunan deputat Eva Kayli də xüsusi aktivlik göstərmişdi.
Bəyanatda Azərbaycan silahlı qüvvələrinin “Ermənistanın ərazi bütövlüyünə qəsd etməsi” kimi qondarma ittihamlar yer tutmuşdu. Həmin 33 deputat da “Ermənistanın ərazi bütövlüyünə qəsd edilməsinin qarşısını almaq üçün” Avropa İttifaqını bütün rıçaqlardan istifadə etməyə çağırırdı. Yəni, Eva Kaylı erməni diaspor nümayəndələrindən də lobbiçilik adı ilə rüşvət almış, onların xeyrinə qətnamələr qəbul edilməsinə şərait yaratmışdı.
Bu gün də eyni proseslər baş verir. Nümunələr çoxdur, lakin hamısını sadalamağa zərurət yoxdur. Nəticə budur ki, ABŞ və Qərb institutlarında vacib mövqe tutan şəxslər təkcə “dövlət maraqları”ndan deyil, həm də şəxsi maraqlardan çıxış edə bilirlər. “Lobbiçilik fəaliyyəti” adı altında rüşvət alıb, yanlış qərarlar qəbul etdirə bilirlər. “Erməni şəbəkəsi” bu faktordan ciddi şəkildə faydalanır. Son günlərdə Qərb institutlarında ortaya çıxan anti-Azərbaycan ritorikasında bu xətt çox aydın şəkildə hiss olunur.
Ermənistan 2020-ci ildə – II Qarabağ savaşında məğlubiyyətə uğrayıb. İndiyədək məğlubiyyət sindromundan çıxa bilmir. İş o yerə çatıb ki, Nikol Paşinyanın komandası ermənilərin son 2 yüzillik ideologiyadan imtina etmək məcburiyyətində qalması barədə tezisi gündəmə gətirib. O, “tarixi Ermənistan” ideologiyası ilə “müasir Ermənistan” ideologiyasının qarşı-qarşıya gəldiyini, “müasir Ermənistanı qorumaq üçün” “tarixi Ermənistan ideologiyasından imtina etmək məcburiyyətində qaldıqlarını” etiraf edib. Erməni kilsəsi və erməni diasporu isə bununla barışmır. Həm Paşinyana, həm də Azərbaycana qarşı silsilə hücumlar təşkil edir. Dünya erməniləri son həmləsini gerçəkləşdirir. ABŞ və Avropa institutlarından istifadə edərək, Azərbaycana təzyiq göstərmək, geri addım atmağa məcbur etmək istəyir.